Palm Beach – Noord
Diadomingo den careda di 3’or y 45 di marduga, presencia di polis a wordo pida na Lekker Bar & Restaurant na Noord pa motibo cu un of mas persona a pasa los tiro riba varios auto dilanti Lekker.
Mesora varios unidad policial a bay na e sitio, na prome instante tabata trata di tres auto cu lo a ricibi impacto di bala, pero despues a resulta cu ta hopi mas auto den careda di 8 pa 10 auto. Niun persona a keda herida. Tambe polis no a haya niun huls, un indicacion cu lo ta trata di un of mas arma di candela di bari manera e ta wordo yama.
Polis a cera e caminda dilanti Lekker Bar & Restaurant pa mas investigacion. Departmento Tecnico y recherchenan ta na e sitio pa haci e investigacionnan necesario. A pensa cu lo a bay cera Lekker mirando cu e tawata yen yen y tur hende canando ariba tur posibel evidencia, pero esaki no a sosode.
Locual e persona of personanan aki di mente maligno a overlook ta cu den e area ey varios negoshi tin Security Cameras. Pues autoridad lo bay tin suficiente evidencia pa por aresta e persona of personanan aki lihe, mirando cu nan ta un menasa pa nos comunidad.
E acto aki ta uno hopi peligroso y serio. Algun dia pasa un dama bayendo su cas den su auto na altura di Cas Casuela, desconocidonan a los tiro riba su auto y e dama a ricibi dos impacto di bala. Spera cu pronto autoridad pone man riba e persona of personanan cu ta cometiendo e atentado aki contra hendenan inocente ariba caya.
Tur esaki a sosode mientras cu tawata tin diferente unidadnan policial haciendo controlnan tur caminda na Aruba. Asina nos por mira cu tin hopi arma di candela den circulacion y den man di hendenan sumamente peligroso di mente.
