Despues cu riba 8 di juli e informadornan, señor Eddy Werleman y señora Tisa LaSorte, a entrega e acuerdo di boluntad (‘bereidwilligheidsverklaring’) na Gobernador di Aruba, Su Excelencia Alfonso Boekhoudt, awe señora Evelyn Wever-Croes, lider di partido Movemento Electoral di Pueblo (M.E.P.), a entrega e declaracion di intencion (‘intentieverklaring’) na Gobernador cu e lidernan di partido M.E.P. y RAIZ a firma ayeranochi. Awe e informadornan a entrega tambe e rapport final na Gobernador Boekhoudt. Cu esaki e encargo di informacion ta oficialmente completa.
Di acuerdo cu e rapport final di e informadornan y mirando e acuerdo di boluntad y declaracion di intencion firma, riba diabierna 9 di juli Gobernador Boekhoudt a apunta señora Evelyn Wever-Croes como formador. Gobernador a duna señora Wever-Croes e encargo pa forma un gabinete stabiel cu tin confiansa di e fraccionnan M.E.P. y RAIZ y cu ta consisti di personanan cu ta dispuesto y capaz pa yega na un maneho conhuntamente, dirigi riba recuperacion financiero y socialeconomico pa Aruba, particularmente riba implementacion y realisacion di e Landspakket Aruba.
Parti di e encargo di formacion ta e composicion di un acuerdo di gobernacion general entre M.E.P. y RAIZ y un reparticion di cartera denter di e gabinete nobo. Finalmente mester controla adelanta e capacidad di e candidatonan pa e funcion di minister y di minister plenipotenciario a base di e proceduranan cu ta referi na dje den e decreto nacional di 9 di september 2013.
Riba mas tarda 9 di augustus proximo e formador mester informa Gobernador Boekhoudt por escrito tocante su conclusionnan. Mientras tanto e formador lo informa Gobernador verbalmente, of si ta nesesario por escrito, tocante e progreso y implementacion di e encargo di formacion.
A informa e lidernan di fraccion den Parlamento por escrito tocante di e encargo di formacion y di e echo cu señora Evelyn Wever-Croes ta tene esaki na consideracion. Si acaso e formacion ta exitoso, manera custumber e formador lo accepta e encargo oficialmente. A apela e lidernan di fraccion pa proporciona cooperacion debidamente na implementacion di e encargo di formacion.