Home » WENDRICK CICILIA: “Na cada parlamentario; Boso tempo ta awor”

WENDRICK CICILIA: “Na cada parlamentario; Boso tempo ta awor”

by Admin
0 comment 92 views

Cu un curason yena cu speransa y expectativa nos ta yama bon bini na un constelacion parlamentario nobo pa periodo 2021-2025. Como un hoben profesional y alabes hoben politico e ta importante p’ami comparti un reflexion breve. Un parlamentario ta un representante di e pueblo Arubano den su totalidad. Na momento cu bo wordo escogi democraticamente bo no ta representa e bienestar partidario di bo partido politico, ma bo ta wordo elegi pa sirbi e bienestar general di pueblo y pais. Mirando e panorama actual, mirando e circunstancia nan actual  y e reto nan sin precedente cu nos Pais ta enfrentando e proximo parlamento lo ta determinante pa nos presente y tambe e futuro di nos generacion nan cu lo bai biba cu consecuencia di e decision nan politico cu lo wordo tuma e proximo periodo nos dilanti.

 

Awe mi ta dirigi mi mes na cada parlamentario. Un parlamentario tin un yamada celestial den un tempo na unda cu e panorama ta uno sumamente negativo pa pueblo y pais. Pa es motibo mi ta hasi un apelacion special na cada parlamentario cu lo huramenta awe pa haci un compromiso interno. Haci un compromiso pa cu bo alma y curason, utilisa bo conocemento, energia y talento pa transforma austeridad den prosperidad y felicidad. Nunca lubida e esencia di ta un sirbido publico. E mandato na cada parlamentario ta pa redacta concepto nan di ley cual ta proteha y alabes crea oportunidad. Influencia e maneho for di un posicion di autoridad, incentiva maneho cual ta beneficia cada ciudadano, inversionista,tambe nos empresario y empresario nan hoben, ma nunca lubida es nan mas vulnerabel den nos comunidad. Mi ta urgi cada parlamentario pa realisa cu nos parlamento ta e instituto mas halto den nos sistema politico arubano cu e competencia necesario pa determina un rumbo nobo pa nos pais.  Nos constitucion ta brinda cada parlamentario instrumento nan constitucional pa lucha pa felicidad y prosperidad di cada ciudadano. Ta momento pa parlamentario nan asumi responsabilidad y realisa pakico nan a wordo yama. Yama pa crea oportunidad igual, husticia y prosperidad mediante concepto nan di ley innovativo. Yama pa supervisa estrictamente e conducta y maneho hiba pa cada mandatario. Como hoben profesional mi ta entrega mi confiansa den boso man, cu den boso curason semper reina e deseo pa laga bienestar general prevalece ariba bienestar partidario. Mi ta confia cu cada parlamentario lo contribui na eleva  e nivel di politica y inspira un Pais cu tin un necesidad grandi pa un perspectiva positivo. Mantene e nivel den e sala di parlamento na un nivel profesional, enfoca riba contenido y alabes reflehando e union cu nos Pais ta anhela. 

 

Mi ta apela na nos Creador pa sabiduria divino, curashi, balentia, amor y bendicion compaña cada parlamentario cu lo hurmanenta awe. Mi ta urgi boso pa conserva e idea y e vision cu Creador a deposita den boso curason. E deseo pa sirbi  y no wordo sirbi. Den e momento nan transcendental cu nos ta bibando aden, nos Pais merece trankilidad, union, perspectiva y  un speransa pa un mihor futuro. Mi ta desea for di e profundidad dimi curason tur clase di exito na cada parlamentario cu lo huramenta awe. For di mi curason  escritamente mi ta comparti lo siguiente cu cada parlamentario;

 

“Laga e deseo pa crea un mihor calidad di bida pa e ciudadano ta e motivacion y inspiracion. Lanta cada mainta cu energia renoba pa asina contribui na recuperacion di nos Pais. Bo ta pertence na e 21 nan escogi pa Creador y comunidad  pa e tempo aki, pabo causa un impacto cu lo marca historia. Asumi e yamada cu hopi responsabilidad y corda semper laga bo curason wordo guia pa e principio nan ariba cual nos sociedad ta construi cual ta integridad, humildad y amor pa prohimo. Cu Dios bendiciona cada Parlamentario cu lo huramenta awe. Boso tempo ta awor!”

 

Wendrick Cicilia

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio