Home Politics Mansur ‘forma un bloke di 5 y un gobierno nobo cu un...

Mansur ‘forma un bloke di 5 y un gobierno nobo cu un base mas amplio, di mas cu 12 asiento

SHARE

Sr. Miguel Mansur a bisa di ta hopi honra cu 2019 persona a deposita nan confiansa den su persona.

Oranjestad: Diamars merdia, lider di Accion21, sr. Miguel Mansur a bishita Gobernador, relaciona cu e prome pasonan pa cuminsa na forma un gobierno nobo.

Segun Mansur, un tercer parti di e votadonan na Aruba a vota contra e partidonan grandi, pero segun su persona
nos sistema di leynan anticua no ta facilita un repartimento husto di asiento.

Sr Mansur kemen cu e retonan su dilanti ta pa mira con por uni e pais, esaki lo ta posibel cu un gobierno cu un base mas amplio posibel di 14 asiento, cual no por exclui MEP, pero AVP si. Segun su partido nan no lo sostene un gobierno di menos di 12 asiento, e mester ta mas cu esey, pero si tin un posibilidad cu locual nan a campaña cu ne cu ta un Gabinete Nacional, esey tin nan preferencia, un gabinete nacional forma cu tur 5 partido, incluyendo AVP. E ta boga pa tur 5 partido pone politica un banda y enfoca riba e pueblo.

Segun su persona e reconteo lo por cambia e situacion, cu MEP lo perde un asiento y esaki lo bay pa AVP. Tambe e la papia di un gobierno cu vak minister y tur partido bay sinta den parlamento.
Accion21 lo desea di mira un gobierno di 14 asiento cu lo por haci cambionan den nos staatsregeling, nan kier modernisa nos kiesverordening.

Segun su persona y Sra. Marisol Lopez Tromp, lider di MAS ta para riba e mesun linea, referente e bloke di 5, cu nan kier forma, segun su persona esaki lo empoderanan pa nan representa un tercera parti di e poblacion cu segun nan no ta conta cu un representante digno y husto den parlamento.

E lider di Accion21 ta spera cu den e dianan nos dilanti, nan lo por bay combersa cu lider di partido RAIZ, pa nan logra e bloke aki. Maske nan a trata na tur forma caba di acerca Sr. Ursell Arends, pero no a logra.

Otro siman diabierna e parlamento nobo di Aruba lo huramenta y segun su persona e posibilidad ta grandi cu lo por vota pa un presidente di parlamento cu no ta di e dos partidonan grandi.
Miguel Mansur ta spera cu nan haya e apoyo necesario den esaki, paso esey tambe lo marca historia.

Segun su persona pueblo a vota pa un cambio y e tin e solucionnan. Su preferencia lo ta pa bay parlamento prome pa coi experiencia.

Mansur a finalisa bisando cu e bloke di 5 ainda no a formalisa, pasobra nan ta wardando pa papia cu Sr. Arends prome, pero te na e momentona aki sin resultado y e la bisa cu e bala ta den scochi di RAIZ.