Diadomingo anochi nos por a cuminsa mira un area turistico hopi bon bishita, pasando den e area di Hot zone na Palm Beach, entre otro na The Village, South Beach, Arowak Garden, Paseo Herencia etc. hopi turista canando.
E area aki ta conociendo un aumento hopi lihe den e sector turistico, negoshinan a cuminsa draai bek, te hasta nos por a mira dilanti algun establicemento fila di turistanan para pafo di restaurantnan, wardando pa haya un mesa pa nan por disfruta di nan cena.
Bar, nightclubs, restaurantnan, e kioskonan pafo tur caminda por a mira e turistanan bek, sinta riba terasnan, canando, cumprando y gosando di nan vacacion. Esaki sigur ta danki na e programa agresivo di vacunacion, Aruba ta conta cu 67% di su habitantenan cu a vacuna caba. Asina aki a logra baha e infeccion di Covid-19 na un minimo, actualmente bou 5 caso.
Segun nos a compronde, cu e placa den circulacion ta aumentando bek y hopi acelera. Lo tin un
crecemento Economico pa 2021 pa 2022.
Door di e crecemento aki cuponan di trabou lo sigui aumenta, Aruba ta riba un bon caminda, esaki sigur ta danki na e bon trabou di Crisis Team y gobierno pa desicionnan cu hopi biaha no tabata popular, pero na final di dia tabata desicionnan corecto.
Tambe danki na tur Minister, tur parlamentario, tur ambtenaar cu a entrega y asina gobierno por a bin cu fase y Loonsubsidie pa a yuda tur esnan cu a perde trabou y a perde nan entrada.
Henter Aruba di un manera of otro a coopera y hunto ta yudando pa nos ta pasa den e pandemia y e crisis di mas grandi di siglo. E pandemia a afecta Aruba hopi, Aruba poco poco ta progresando bek y cu e sacrificionan haci pa nos tur di nos tur, Aruba lo sali for di e pandemia aki.