ORANJESTAD – Dia 17 di juni Nacionnan Uni (UN) a declara dia di observacion pa e conscientisacion pa combati secura y suelonan degrada. Locual na Ingles nan a yama Desertification and Drought Day. Directie Natuur en Milieu (DNM) ta colabora cu e parti di conscientisacion riba e tema aki cu ta di sumo importancia mirando cu nos ta depende di nos suelo den bon condicion y gran parti di Aruba su clima ta uno di secura.
Ora cu nos ta papia di suelo degrada esaki ta consecuencia di rosamento y erosion acelera. E proceso aki ta consecuencia di actividadnan humano caminda e suelo tin necesidad di restauracion asina yuda combati cambio di clima y brinda servicionan pa yuda e biodiversidad y humanidad ainda mas. Tin un yamada urgente mundialmente despues di e pandemia pa mundo recupera na un manera sostenibel asina crea economianan mas resiliente pa futuro.
E obhetivo di conscientisacion pa e dia observa aki den 2021 ta pa demostra cu si inverti den suelonan saludabel como parti di e recuperacion, esaki lo ta un bon decision economico tambe. E inversion ta crea cuponan di trabou, duna stabilidad vital, garantisa calidad di cuminda, saca carbono toxico for di atmosfera, combati cambio di clima y trece balansa den biodiversidad ecologico. Cu conscientisacion pa combati secura y suelonan degrada ta yuda crea mas accion pa proteha y restaura areanan natural, asina tambe yuda cu e avancenan pa alcansa e 17 metanan di desaroyo sostenibel di UN (SDG’s).
Unda nos ta awo?
Mundialmente, tres cuarto (¾) di mundo su suelo, sin conta aden e parti cu ta cubri pa ijs, a transforma y ta usa pa aloca necesidad humano manera por ehempel cuminda y desaroyo. E suelo degrada ta impactando calidad di bida di hende y bestia. E consecuencianan ta por ehempel; cu miyones di especienan ta na borde di extincion, emision di gasnan greenhouse (GG) lo hisa temperatura global y ta habri caminda pa mas malesanan contagioso manera esun di Covid-19 . Na Aruba, tin limite na espacio pa tereno destina pa cas of otro practica manera esun di plantamento. E practica di rosa tereno completo ta uno anticua y cu consecuencia pa e suelo y medio ambiente. Kitando matanan y e capa di suelo of cobamento ta acelera e proceso di erosion cu ta degrada e suelo aun mas.
Kico ta e solucionan?
Restauracion di mondinan den area di bahianan manera esun di matanan di mangel. Plantamento di matanan local den bo cura, tereno of areanan publico. Conscientisacion riba e tema, busca informacion di expertonan, yuda un organisacion pa sembra y planta mata manera esun di Ban Lanta y Planta, siña practicanan mas innovativo di agricultura,y siña biba den harmonia cu naturalesa. Algun di pregunta cu bo por haci na bo mes ta: mi bario y mi comunidad ta biba den harmonia cu naturalesa? Mi ta consciente di mi impacto di consumo?, E companianan cu mi ta sostene ta eherce practicanan sostenibel?, Ami tambe por ta un activista? -mandando carta di preocupacion pa cu restauracion di areanan na unda cu e suelo ta degrada, preocupacion pa cu secura y planificacion di uzo di terenonan y e suelo.
DNM ta uni na e yamada pa encurasha un y tur pa establece un mihor relacion y amor pa naturalesa. E yamada na comunidad global pa cu e dia observa aki ta pa trata nos suelo y tera manera un recurso limita y precioso cu mester di restauracion y proteccion.