Home Politics ALVIN MOLINA SU PERSPECTIVA DI POLITICA

ALVIN MOLINA SU PERSPECTIVA DI POLITICA

SHARE

SAN NICOLAS; Desde cu Alvin Molina a wordo lansa riba lista MEP como candidato number 10 e la ricibi hopi aprecio y interes pa e manera con e ta hiba politica. Recientemente Molina a comparti su perspectiva di politica por medio di un serie di 3 video riba su pagina di Facebook cu a hala hopi atencion. 

 

Molina ta expresa su perspectiva di politica di e siguiente manera: Tin hende cu ta bisa cu politica no ta pa nan y nan no ta kere cu gobernacion por hasi un diferencia. Politica ta manera un ley di naturalesa, manera gravedad, no ta necesario pa bo kere den dje pa e ta real, si bo kere den dje of no, e ta real. Politica ta trata di interes y e manera con bo ta logra e interes. Bo por desea algo bunita of algo cu lo perhudica otro hende. Bo por logre na un manera honesto y integro of via canalnan cu no ta na interes general. Politica ta tur caminda. Dimes den gobierno, pero tambe den cualkier compania cu bo ta traha. Empresa grandi of chikito. Hasta den famia na cas. Den cada famia sa tin discusion over ken su idea ta mas miho of ken ta haya e delaster pida chuculati….esey tambe ta politica. Politica ta na trabou buscando un promocion of motorcyclistanan cu ta practica nan deporte riba caminda publico. Atrobe, cuestion ta con bo ta deal cu e politica. Bo ta bringa pa e chuculati pa come bo so of bo ta parti cu bo ruman, bo ta gaña riba bo colega of bo ta studia pa bo merece e promocion. Como gobernante, esun na cabes pa guia, bo ta ignora e grupo di deportista, of bo ta percura pa nan haya un luga adecua pa nan por eherce nan deporte na un manera sano, mientras ta trece pas, trankilidad y seguridad na comunidad. Mi ta para pa transparencia, integridad y husticia. 

 

Tur cos na mundo ta desaroya y evoluciona. Tecnologia, medicina, turismo, deporte….politica tambe ta evoluciona. Evolucion ta bin, si nos kier of no. Pense… Politica, parti di dje ta entertainment, drama, novela, pa hacie mas interesante, it’s show business. Pero awendia mas y mas hende kier mas cu solamente entertainment den parlamento y gobierno, nan kier representantenan cu ta produci, duna cuenta, responsabilisa nan presencia. ‘Semper nos a hacie asina’, no ta wordo acepta door di mayoria mas. Awendia por mira, tende, hasta sinti mas y mas cu pueblo ta mira e persona tras di e dashi. Ki contenido e tin, kico e por significa pami y mi pais. Minister awendia no por haci loke cu nan kier sin duna cuenta y parlamantarionan mester ta un “role model” tanto den parlamento como pafo di parlamento. Na final ta representante di pais e persona ta. Esey ta rekeri un cierto tipo di politico y un cierto tipo di politica avansa. Politica mester y lo sigi evoluciona na bienestar di nos pais. Pa e motibo aki mi a dicidi di drenta politica, pa duna mi aporte na e desaroyo aki. Cu mi experencia amplio den Cuerpo Policial y e vision pa pone e ser humano central, mi ta comprometi pa sirbi nos pais Aruba. 

 

Awo cu tin un crisis mundial, mas cu nunca ta importante pa nos tin colaboracion entre ministernan, parliamentarionan, partidonan, den coalicion y tambe oposicion. Cada partido tin su ideologia, cultura y manera di goberna. Den un democracia nos tur tin e derecho pa scoge un partido, un team, un persona cu mas nos por identifica cu ne pa logra nos metanan. Anto ta net e meta ey ta e un cos cu nos tur tin cu ta di acuerdo cune. E meta pa un miho Aruba, logrando esaki door di optimalisa e servicio duna door di nos hendenan na nos hendenan, haciendo uso di ideanan y talentonan di nos hendenan. Paso na final di dia e meta ta pa hunto nos sirbi nos comunidad. Mester evalua procesonan interno di departamentonan di gobierno y mira con pa mehora esakinan. Nos tin hendenan capacita ta traha den gobierno, pero mester reforsa nan plataforma y traha hunto cu nan pa agilisa y modernisa procesonan den a aparato gubernamental. Ban balora opinion, diferencianan i abilidad di otro. Ban pone tur e bon intencion nan hunto y hinca nan den un plan cu por wordo carga na un manera cu exito ta e meta. Ban enfoca riba futuro. Evalua unda nos ta awe y planea pa dilanti pa un miho porvenir pa cada habitante.

Politica ta toca nos tur, pesey “with your hand in mine”, nos lo sigui avansa. Mi tey pa sirbibo y mi ta conta cu bo sosten!