Minister Glenbert Croes ta wak bek riba un pandemia cu a destrui hopi cupo di trabao, a trece luto den hopi famia y a kibra soño den hopi hogarnan. Na mes momento esaki ta hustamente locual ta pusha e mandatario pa lucha duro pa tur esunnan cu di un dia pa otro a perde tur cos.
E mandatario a defini su compromiso y vision p’e proximo 4 añanan di Gobernacion. Un di e metanan cu ya ta trahando riba dje ta e 100% recuperacion salarial pa empleadonan publico y priva. Aruba ta riba caminda di recuperacion. E siman aki nos pueblo tabata testigo di e prome barco crusero cu a drenta nos waf atrobe. Ocupacion na hotelnan di Aruba tambe ta aumentando. Aruba ta riba caminda di recuperacion danki na entre otro locual IMF mes a declara, e reaccion y medidanan inmediato di Gabinete Wever-Croes na 2020 manera introduccio di FASE y Loonsubsidie, cu hunto a logra scapa bida di hende.
Pero mescos cu nos pais y nos pueblo a logra surpasa e crisis aki, ainda tin metanan pa logra unda cu e ser humano lo ta semper central den tur Minister Glenbert Croes su decisionnan:
Pa anuncia algun: riba tereno social, lo percura pa implementacion di Sociaal Crisisplan II pa 4 aña mas pa asina sigui atende cu e problemanan social cu ta grandi riba nos pais. Social Crisisplan I a logra pone un fundeshi solido pa e solucionnan. Sociaal Crisisplan II ta pa logra ehecuta e solucionnan cu mester bin pa nos problemanan social cu ainda ta grandi. Bishitando casnan a keda constata cu e scarcedad di vivienda pagabel ta hopi grandi mes. Casnan social digno basicamente a bira un luho ya cu no tin disponibel. E mandatario den Gabinete Wever Croes II lo percura pa construccion di casnan social digno y pagabel pa famianan por tin un dak pa por forma nan hogar na un manera digno pa duna nos criaturanan e paz y trankilidad di un hogar.
Na mes momento ta trahando riba e parti dos di FASE cu lo bira TIO cu ta un “Tijdelijke Inkomensondersteuning”. E entrada di TIO ta mara na bo ultimo salario registra na SVB cu un minimo di 1250 te n’un maximo di 2950 mensual. TIO su condicionnan lo ta entre otro recapacitacion (her-, om- en bijscholing). Pues esun cu haya TIO mester bay sigui cierto cursonan y via e plataforma Aruba Kier Traha, reintegra su mes den e mercado laboral.
Riba tereno laboral lo traha riba 100% recuperacion salarial di tur empleado. E mandatario lo continua cu e maneho cu el a introduci manera cu el a huramenta na 2017: lo sigui pone trahadonan-, profesionalnan- y contratistanan local prome na trabou. Mescos cu el a reduci desempleo den pasado, e lo sa cu su maneho di proteccion percura pa tur hende local haya trabou prome.
“Nos a demostra cu nos por. Den un crisis nunca antes visto, nos a sa di mantene nos hendenan y nos pais cu cabez riba awa. Cu e mesun tenacidad aki, nos lo sigui traha pa recuperacion di nos Pais. Awo no ta momento pa aventura. Aruba mester di un Gobierno estable, mandatarionan capacita, cu experiencia y cu curason pa nos pueblo, cu por garantisa 100% recuperacion di nos Pais y nos Pueblo”, tabata palabranan di Minister Glenbert Croes.