Home Corte Entre 16 y 5 aña di prison exigi pa grupo cu a...

Entre 16 y 5 aña di prison exigi pa grupo cu a haci cantidad di asaltonan arma na cas di famia  

SHARE

ORANJESTAD – Recientemente den sala di Corte di Husticia, a trata un caso grandi di asalto arma y violencia.

Aruba Native por a compronde Fiscal a baha pisa riba un grupo di 10 persona, di cual e mayoria ta Venezolano ilegal, cu a haci un cantidad di asaltonan arma na cas di famianan.

E caso aki ta hiba e nomber Falcon y e sospechosonan ta:  Dos ruman Venezolano J.V.V. y C.V.V., e Venezolano A.D.B., e dama Venezolano muher C.A.W., e Venezolano J.P.B., e Venezolano F.B.R., e Arubiano W.N.V., e Venezolano M.G.A., e Arubiano D.J.R. y e Venezolano F.M.S.

ASALTONAN ARMA

Fiscal a bisa Hues cu e grupo aki a haci 7 asalto arma cu violencia den un periodo di 3 luna. Fiscal a mustra cu e grupo aki tabata drenta cas di famia, menaza hende cu arma caminda tabata pone e arma na cabez di hende, dal y skop hende. Tabatin caso caminda mucha chikito a mira con e asaltantenan aki tabata bati nan mayornan.

Fiscal a condena e hecho cu e famianan a pasa tur e trauma aki den nan propio cas. Nan cas caminda nan mester sinti nan mes sigur. El a mustra cu hasta muchanan den cas, e asaltantenan a pone paña rond di nan cabez. Fiscal ta haya cu esaki ta un violacion di privacidad di hende.

Fiscal ta haya cu mester manda un señal bon cla den comunidad cu no ta tolera asalto arma, den ningun forma na Aruba. El a bisa cu e grupo aki a haci e asaltonan arma, puramente pa haya placa.

CASTIGO PISA

Fiscal pa cu e castigonan, a tene cuenta cu e participacion di cada un di e sospechosonan. No ta tur a haci tur e asaltonan. El a exigi 16 aña di prison pa M.A.G.A., kende ta esun cu tambe a haci asalto arma cu un otro grupo y a bati un Chines di edad. Fiscal tambe a exigi 16 aña di prison pa: A.J.D.B., J.L.P.B. y J.C.V.V.

Fiscal a exigi 15 aña di prison pa D.J.R., 12 aña di prison pa e dama C.A.W., 10 aña di prison pa C.J.V.V., 6 aña di prison pa W.S.N.V. y F.J.B.R., 5 aña di prison pa F.R.M.S.

Despues di a scucha e defensa di e abogadonan, Hues a sera tratamento di e caso y dentro di algun siman lo por spera sentencia.