Recientemente Minister di Husticia, Siguridad y Integracion, mr. Andin Bikker a entrega diploma na un grupo di trahadonan na Guarda nos Costa. Ta trata aki finalisacion di un trayecto largo di curso pa bira “Buitengewoon Agent van Politie”. Un grupo di seis trahado a haya e status special aki, cu ta duna nan mas autoridad pa actua como un polis extra-ordinario, pero trahando den Guarda nos Costa specificamente riba control di costa y di ciudadanonan sin un permiso legal di estadia of di trabou riba nos isla.
Hefe di Guarda nos Costa, Richard Kramers, tabata masha contento ora di entrega e diplomanan aki den presencia di Minister di Husticia, cu a sostene e cursonan aki y a haci posibel cu seis trahado awo ta conta cu e autoridad necesario. Ta trata aki di D. Arends, M. Williams, R. St. Jago, G. Delaney, V. Henriquez y J. Martina.
Minister Andin Bikker a enfatisa durante su discurso cu e ta bandona e puesto cu un sentido di orguyo grandi den su curason, di tur locual a logra pa e departamento aki. E ta corda den ki estado el a hered’e na 2017 ora di asumi e funcion. Mester a traha duro pa finalisa e aspectonan huridico pa haci e grupo un departamento formal. E pandemia no a bin pa yuda tampoco, pero cu sosten adicional di Gobierno di Hulanda, a logra yega na extra fondo pa por a adkiri mas ekipo pa e departamento, a logra drecha e facilidad na aeropuerto y esun na unda antes Huis van Bewaring tabata situa na Dakota. A logra cu por a introduci entre otro un uniform nobo pa e trahadonan, autonan nobo, mobilofoon, a cambia e Toelatingsbesluit pa cu e retonan regional, y a zorg pa curso adicional pa nan ta miho prepara pa e aumento di casonan di ilegalnan cu ta subi tera na Aruba.
Y den cuadro di por brinda asistencia necesario na tur momento, a prepara un curso special di “eerste hulp bij ongelukken” facilita door di Rode Kruis Aruba. Un total di 47 empleado a pasa e curso aki cu exito pa cual a ricibi nan certificado oficial di Cruz Cora Aruba, den presencia di Minister Andin Bikker. E ultimo aki a felicita tur e empleadonan y a expresa su deseo di sigui mira tur progresa, sigui mas curso, sigui mas proceso di capacitacion, pa por crece den e trabou aki.
