Avenida Milo Croes, Oranjestad: Diahuebs algo despues di 8’or y mey di anochi, a sosode un accidente hopi serio na e T kruising di Avenida Milo Croes, dilanti di Directie Voogdijraad.
E brommer MFA 138, tabata biniendo di pariba y e auto, un Mitsubishi Galant, maneha pa un meneer grandi di edad tabata biniendo di pabou, e no a duna preferencia na e brommer y a lora su dilanti.
E impacto tabata hopi fuerte cu e dos personanan riba e brommer, un dama y un cabayero a wordo saca, ambos a bay cay basta leu for di unda e impacto a tuma luga.
E dos persona nan riba e brommer a keda gravemente herida, e dama tabata grita di dolor na su brasa y e cabayero a fractura su pia seriamente.
Dos ambulance a yega mesora na e sitio y e paramediconan a cuminsa trata e heridonan, a dura basta minuut pa a stabiliza nan y hinca den ambulance. E dos heridonan a wordo transporta cu urgencia pa hospital.
Na e sitio por a mira varios unidad di polis y polis di trafico tambe. E caminda a wordo cera pa trafico. Un rato despues por a mira oficialnan di departmento tecnico di polis na e sitio, pa asina haci mas investigacion.
Instancianan concerni tambe a wordo pidi na e sitio, entre otro Fiscal van der Biezen hopi lihe a presenta na e sitio.
