ORANJESTAD – Ministerio di Cultura Aruba, conhuntamente cu Departamento di Cultura Aruba y Cas di Cultura Aruba dia 8 di mei ultimo a organisa den Cas di Cultura e celebracion di Dia Mundial di Teatro y Entrega di Premio Nacional di Teatro 2020-2021.
Cada aña ta otorga e Premio Nacional di Teatro na un persona, grupo of fundacion cu a traha y cu a contribui grandemente cu e desaroyo di teatro na Aruba. E biaha aki tres premio a wordo entrega.
‘Premio Nacional di Bida Largo”
E ‘Premio Nacional di Bida Largo” e aña aki a bay pa Cas di Cultura pa e contribucion cu Cas di Cultura a y ta duna e mundo di teatro na Aruba pa mas di 60 aña. Ta prome biaha cu Cas di Cultura ta ricibi un reconocemento asina. Esaki ta un premio cu ta wordo entrega na celebracion di cada lustro.
‘Premio Nacional di Teatro di Aruba’
E di dos ta e ‘Premio Nacional di Teatro di Aruba’ e aña aki a wordo otorga na e directora, actriz y escritora di teatro sra. Lenie JeanD’or, pa tur su trayectoria y excelente aporte den e mundo teatral y pa publicacion di su 2 buki: “Manual pa Escenario”.
‘Reconocimento’
E di tres ta un reconocemento pa Jhon Freddy Tobón Montoya pa su aporte incalculabel na Cultura di nos Pais, un persona cu ta duna su alma y curason pa tur loke ta arte riba tarima. Desde aña 2000 sr. Jhon Freddy Montoya, den su funcion como empleado publico na Instituto di Cultura, loke awe ta Departamento di Cultura (DCA), a organisa e Dia Mundial di Teatro consecutivamente. Un certificado a wordo entrega como tambe un obra cu ta un creacion di sr. Frank Croes.
Den su discurso Minister di Cultura Xiomara Maduro a felicita tur organisacion, actor, director, escritor, productor, compositor, poeta, tur profesional y no-profesional den e ramo di teatro, riba ‘nan día’. Ademas e mandatario a bisa danki tambe na tur e actor, empleado y boluntarionan di DCA, cu a duna nan cooperacion pa haci e anochi aki posibel.
