Palm Beach: Diamars algo prome cu 10’or di mainta, presencia di polis ta wordo pidi na Divi Phoenix Hotel, pa un persona cu lo ta dicidido pa pone fin na su bida. E persona a subi para riba un mesa, riba un balcon di un camber na di 7 piso, coleganan mesora a bati alarma y a keda papia cu ne.
Na yegada enberdad polis a topa cu e homber para riba un mesa y nan a papia cu ne, e homber a keda dicidido pa pone fin na su bida. E la stap over di e reling di e balcon y a keda wanta na e reling. E agentenan policial a haci nan best y esfuerzo pa cambia idea di e homber, pero e no kier a rasona.
Mientras cu polis tabata papiando cu e homber, nan a pidi cu urgencia presencia di ambulance y slachtofferhulp. Na momento cu un persona a gara e homber cu e intencion di pas’e bek over di e reling, e homber a laga bay y a bin abou, e la dal na e di dos balcon y despues a cay riba vloer. For di leu por a scucha gritonan, turistanan y coleganan tabata den shock y hopi tabata awa na wowo.
Mesora paramediconan a control’e, lamentabelmente e no tabata duna señal di bida mas. Mesora polis a cera e area di e pool grandi, unda e homber a cay. Un cantidad di turista y coleganan di e defunto tabata para ta mira locual a sosode, segun time share ownersnan di Divi Phoenix cu tur aña ta bin Aruba, tabata comenta cu e defunto tabata un empleado hopi alegre, semper cu un smile y cu nunca nan por a pensa cu e lo por a haci algo asina.
E acto di comete suicidio na e forma aki no ta algo usual na Aruba, e la yega di sosode cu turistanan a yega di bula for di piso y pone fin na nan bida. Pero no di e forma cu a top’e na bida y dialogando cu ne, e la bula.
Arubanative.com ta extende su mas profundo palabranan di condolencia, na famia y coleganan di e fayecido.
