Home Local Kiven M. Dania (21) a wordo acompania pa un cantidad grandi di...

Kiven M. Dania (21) a wordo acompania pa un cantidad grandi di hobennan pa su ultimo lugar di sosiego y henter e entiero polis tabata mantene orden publico

SHARE

Oranjestad: Diabierna for di 11’or di mainta famia y un grupo grandi di amigonan y conocirnan a cuminsa tuma despedida di Kiven M. Dania, cariñosamente yama Kendo di 21 aña. 

Segun nos a compronde na prome instante e curpa di e defunto lo a wordo hiba na Palo Marga, pa motibo cu e Kiven tabata stima e deporte di pustamento di brommer y na varios ocasion a yega di gana caredanan riba e pista di Palo Marga tambe. Pa e motibo aki a planea su ultimo bishita na Palo Marga. Polis na prome instante lo a bay di acuerdo cu esaki, pero despues pa motibonan desconoci a cambia nan desicion. Esaki no a cay den mucho bon tera cerca e amigonan motociclista di Kiven, nan lo a traha nan plan caba pa compaña e curpa pariba y dje bay misa di Dakota.

E amigonan y conocirnan di Kiven a compania e famia for di oranan di mainta na Aurora, den careda di 1’or y 45 di merdia,  nan a compaña e restonan mortal pa misa La Birgen di Fatima, na Dakota. Den misa amigonan, conocirnan y amistadesnan a haya oportunidad di despedi di Kiven. Den careda di 4’or y mey di atardi nan a sali cu e curpa for di misa y a hibe na Aurora Funeral Home, caminda e cremacion di Kiven lo a tuma luga den seno familiar.

Locual nos por a nota ta, cu for di mainta, varios unidad di polis tabata standby, na Aurora, na misa y despues te laat den oranan di atardi, asina mes a sosode algun incidente.

E hoben Kiven tabata traha na D22, cu ta keda na banda di Aruwood, un poco mas pazuid di Aurora Funeral Home aki ta unda e amigonan y conocirnan di Kiven a reuni, na momento cu e curpa a wordo hiba bek na Aurora Funeral Home. E  motociclistanan presente como ultimo despedida, a cuminsa kima tire di brommer y reis e motor di brommer.

Un motoclista cu no a controla su velocidad na tempo a dal patras di un pickup, esaki a sosode entre Kooyman cu D22. E motociclista a fractura un pia y despues cu personal di ambulance a trat’e na e sitio, e la wordo transporta pa hospital.

Mas e oranan pasa, mas halto e tension tabata subi, na dado momento pa motibonan desconoci, un agente policial a dal un homber un klop na su wowo, e homber a keda herida y a wordo atendi pa Rode Kruis. Tambe un camaraman di prensa a wordo agredi pa un conoci di polis, di fam Petrocchi, e persona aki mesora a  keda aresta pa polis.

Un cantidad grandi di hende tabata henter dia presente na e entiero. Tension tabata halto, pa motibo di un cambio abrupto di parti polis, cu nan no por a hiba e curpa na Palo Marga. Nos ta sopone,  cu e cambio di desicion aki a bin, mirando e cantidad di motociclista presente y tambe cu casi sigur lo tabata imposibel pa e polisnan por a mantene orden publico riba e caminda, cu ta un distancia basta largo, di Aurora Funeral Home te Palo Marga.

Remarcabel, tabata cu esnan presente y ni tur e agentenan policial na e entiero, no tabata mustra mucho interes pa tene cuenta cu social distancing, aglomeracion y mondkapje, no ta tur hende tabata tin mondkapje, ban spera cu tur esnan cu tabata presente a tuma nan vacuna caba of no tin e virus.