Ariba 8 di juli 46 studiante di Universidad di Aruba a ricibi nan certificado despues di a completa e Academic Foundation Year exitosamente. Cu esaki nan a completa nan prome anja den educacion avansa, un anja den cual na a desaroya nan mes academicamente, ariba tereno di idioma, escogencia di nan estudio y tereno personal. E anja aki 65 studiante a cuminsa cu e programa, di cual 54 a keda den e programa te na final.
Durante e ceremonia, bou guia di program-administrator Kevin Richardson, studiantenan Stephany Lewis y Amanda Croes a comparti cu tur esnan presente con e programa a influencia nan desaroyo personal. Nan a enfatisa e desaroyo cu nan a experiencia como studiantenan di e programa, no solamente ariba tereno di conocemento y abilidad, pero tambe un desaroyo di nan confiansa y determinacion pa cu e escogencianan cu nan ta haciendo.
Na comienso di e programa hopi studiante ainda ta orienta nan mes ariba diferente posibilidadnan pa estudio prome cu nan tuma un decision definitivo. Nan ta haya e oportunidad pa tuma diferente vaknan di otro facultadnan na Universidad di Aruba y tambe nan ta wordo stimula pa haci un periodo di stage y tuma cursonan online pa orienta nan mes ariba nan futuro. Di e studiantenan cu a completa e Academic Foundation Year cu exito, mita di nan ta keda na Universidad di Aruba pa sigui nan estudio, e otro mita ta opta pa sigui studia na Europa, cu e excepcion di esnan cu ta sigui studia na Merca y un paar di studiante cu ya a obtene un cualificacion profesional y lo subi e mercado laboral.
Universidad di Aruba ta orguyoso di e resultadonan di e studiantenan y ta anticipa e comienso di e di cuater cohort di e Academic Foundation Year na augustus 2019.