Awe 20 di april nos ta recorda cu 30 aña pasa Gabinete Oduber a percura mediante Coastal Oil Corporation pa reapertura di e refineria na San Nicolas. E refineria aki cu durante mas cu 60 aña tabata forma parti importante den Aruba su desaroyo economico a dicidi pa motibonan economico di cera su portanan dia 31 di maart 1985, pues na vispera di entrada di nos Status Aparte. E gobierno di MEP di e tempo ey a haci tur intento pa bolbe habri e refineria, pero e periodo den gobierno a termina na final di 1985. Na December 1985 AVP a drenta gobierno y den e añanan cu a sigui ningun intento a wordo haci pa cu reapertura di e refineria. Echo ta cu dia 29 di januari 1988 Gabinete Eman a firma cu e compania Hulandes Schotte Sloopwerken B.V. y Westcoast pa desmantela e refineria completamente y bende e restonan como hero bieu den exterior. E noticia a causa hopi dolor den pueblo, ya cu e decision aki a trece un fin na e speransa cu e refineria lo bolbe habri un dia.
Salbacion di e refineria na 1989
Sinembargo danki Dios cu na januari 1989 a tuma lugar e eleccion di Staten di Aruba y cu MEP, PPA y ADN a logra forma un coalicion y cu decision a wordo tuma pa para di inmediato e desmantelacion di e refineria. Asina cu sr. Nelson Oduber a asumi responsabilidad como Prome Ministro na februari 1989, el a apunta un team di negociador pa asuntonan di refineria y petroleo. Dia 28 di maart 1989, apenas un luna y mey despues di a drenta gobierno, ex-Prome Ministro Nelson Oduber a ricibi representantenan di Coastal Oil den su despacho. Despues a sigui negosacionnan largo y complica y porfin dia 23 di juni 1989 ambos partido a firma un ‘letter of intent’. E contrato a encera e.o. cu e refineria lo permanece minimalmente 20 aña na Aruba. Dia 19 di oktober 1989 Parlamento di Aruba a aproba e contrato cu Gabinete Oduber a firma cu Coastal Oil Corporation. Despues di trabaonan duro y intensivo e reapertura a bira realidad dia 20 di april 1991, esta riba un dia manera awe 30 aña pasa.
Gabinete Eman a cera e refineria na 2012
Lamentablemente nos mester constata cu despues cu e refineria a opera durante 20 aña, e refineria a stop definitivamente cu su operacion y a cera su portanan dia 15 di November 2012. Y despues di 4 aña biahando rond mundo den busca pa un operador nobo di e refineria, Gabinete Eman a firma un contrato di mas cu 2000 pagina cu CITGO/PDVSA na juni 2016. Sinembargo durante e siguiente añanan no a mira un desaroyo significativo pa cu rehabilitacion di e blender ya cu CITGO no tabatin e fondonan necesario pa inverti den e blender.
Un refineria moderno y mas limpi
Finalmente e gobierno nobo, Gabinete Wever Croes a yega na terminacion di e contrato fantasma cu CITGO na mei 2020. Y awe na 2021 Gobierno di Aruba ta den negociacionnan serio cu e compania Quanten Consortium Aruba LLC relaciona cu reapertura di e refineria. Intencion di Quanten Consortium ta pa cambia e refineria y haci’e uno moderno y mas limpi.
Pues no ta un coincidencia cu awe nos ta para den e mesun situacion cu 30 aña pasa caminda e tempo ey tabata un gobierno di MEP a percura pa reapertura di e refineria cu Coastal y awe ta un gobierno di MEP atrobe, Gabinete Wever Croes ta haciendo su maximo esfuerso pa un reapertura real cu Quanten Consortium. Echo ta cu MEP semper ta sigui cu e idealnan di su lider inmortal Betico Croes: “Si tin 1% di posibilidad pa reapertura di e refineria, mester explora e posibilidad aki profundamente”.