Primavera – Diasabra anochi algo prome cu 9:30 p.m polis a wordo informa di un accidente den area di Plantenrust y cu hende herida.
Na prome instante nan no por a localisa e boksmento.
Despues di un rato a bin topa cu e accidente na un crusada mas panort di Plantenrust. Ariba un crusada den Primavera a bin topa cu un Nissan Sentra y un Nissan Cube.
Den e Sentra e chauffeur lo tawata sinti malo y ambulance tawata na caminda.
E accidente a sosode momento cu e Nissan Cube lo a subi caminda net momento cu e Sentra tawata yegando.
Un impacto bastante fuerte, mirando con ambos auto a keda.
Na yegada di ambulance e paramediconan a controla chauffeur di e Sentra y no a haya necesario pa e bay Hospital.
Momento cu e la bay bek na e Sentra e la wordo deteni door cu e tawata maneha auto bou influencia.
Aunke e no tawata esun cu a causa e accidente.
Den un poco yerba pazuid di caminda polis a haya un hemchi cu boter di cerbes y un boter di Old Parr, esaki nan a wordo saca for di e Sentra prome cu polis a yega.
Un di dos ambulance a yega pa controla e dama na stuur di e Nissan Cube.
Ambos chauffeur tawata ok, pero tawata desea pa wordo controla door di Paramediconan.
Chauffeur di e Sentra a wordo poni den boei y mester a warda pa transportwagen di polis cu a hibe warda di Santa Cruz, unda e lo mester a presenta dilanti un Sub Fiscal.
Dos pasahero den e Sentra mester a yama un persona buscanan y hibanan nan cas.
