Home Local Antes resultado den 1 luna y awo den 1 dia ...

Antes resultado den 1 luna y awo den 1 dia LabHOH awo cu tecnica mas avansa pa diagnostica cancer na pecho Unico lab den region di Caribe cu ta ofrece esaki

SHARE

 

 

ORANJESTAD, Aruba – 26 di maart 2021: Laboratorio nacional di Aruba conoci como LabHOH a logra algo grandi pa Aruba y region, esta logra validacion di SISH (Silver in Situ Hybridisation), un tecnica moleculario pa asina por duna resultado di test na pashentnan cu tumor na pecho den menos di 1 dia. Despues di hopi esfuerso y dedicacion a logra pa pashentnan aworaki ta haya nan resultado mas lihe y alabes ta reduci gasto. Loke antes tabata paga pa resultado di 1 pashent aworaki ta cubri gasto di 50 pashent.  

 

E logro aki sigur ta grandi pa p’e pashentnan cu tin cancer na pecho. Mas o menos 15% di hende muhe cu tin cancer na pecho, hopi biaha tin e gen Her 2 neu amplifica, Zowi Figaroa, analist pathologie LabHOH, a duna di conoce. Esey ta e gen cu ta haci e cancer na pecho mas agresivo. Ta importante pa e gen aki wordo diagnostica, pa asina por cuminsa mas lihe cu un tratamento specifico.  

 

Den pasado tabata manda e testnan afo na Erasmus Universiteit, pero awo ta haci’e akinan mes na e departamento di Patologia na LabHOH. Antes e tabata dura un luna p’e pashent por a haya su resultado y awo ta dura un dia. Tur esaki ta danki na e mashin BenchMark Ultra cu ta haci esaki posibel akinan mes. 

 

Tres luna pasa LabHOH a cuminsa cu e validacion. LabHOH mes a haci e diagnostico akinan y e mesun test tabata manda Erasmus Universiteit pa nan diagnostica tambe. A compara tur e resultadonan cu esun di Erasmus Universiteit y tur a sali identico.  Loke a haci e proceso aki facil tambe ta cu nos tin e mesun mashin cu Erasmus Universiteit, esta e BenchMark Ultra, cu ta haci cu por a compara resultadonan mas facil. 

 

LabHOH ta bay sigui traha cu Erasmus Universiteit pa seis luna mas. Lo sigui compara e materialnan di pashentnan di tanto Erasmus Universiteit como esunnan di LabHOH. Despues di seis luna si tur resultado ta mescos LabHOH lo sigui cune riba su mes.  

 

E tecnica moleculario ta habri porta pa LabHOH, ya cu nos ta e prome den region pa haci esey posibel. P’awo LabHOH a cuminsa cu e tumor na pecho y dentro di poco lo kier uza e mesun sorto di tecnica aki pa diagnostica otro tumor nan tambe manera por ehempel di tripa, pulmon y hopi mas.