Oranjestad – Dialuna merdia den careda di 3’or informacion a drenta di un otro accidente cu UTV ariba e caminda di Natural Bridge. E biaha tawata papia di un accidente hopi serio.
Na yegada por a mira un grupo di turista para rond di un homber drumi di banda ariba parti di e dak cu lo ta di e UTV.
E homber aki hunto cu un amigo tawata den e UTV, momento cu nan a bolter.
E victima tawata bou sanger, debi na un trauma cu e la ricibi banda robes di su cabes.
Na e sitio Arubanative.com a papia cu e turistanan y e otro ocupante.
Segun e ocupante, “We we’re playing”. E la sigui bisa cu nan lo tawata biniendo di pariba y den un bocht nan a perde control, unda cu e UTV a bay cay mas o menos 2 meter mas abou.
Algun turista pasando eybanda mesora a baha y a bay yuda, posiblemente nan a pone e victima ariba e dak, wardando ambulance.
Tur esnan cu a yuda tawata bou sanger di e turista masculino.
Di leu por a mira polis di trafico y ambulance su tras yegando.
Dado momento adrenalina den curpa di e victima a pone lanta sinta, pero visiblemente por a mira e trauma serio na e parti robes di su cabes.
Paramediconan na yegada mesora a mira cu ta algo hopi serio, y asina mes e turista a trata na subi ariba e stretcher, pa despues nan sali cu urgencia cu ne den estada critico direccion Hospital.
Un di dos Ambulance a yega pa trata e otro cu tawata na sanger pero no di dje pero di su amigo.
E cabayeronan aki tin dos dia na Aruba y ta biba na Estados Unidos pero ambos ta procedente di Israel.
Casi tur siman tin accidentenan di sea UTV of Quadracers unda tin turistanan envolvi, tin ta ricibi solamente algun rasca o otronan ta keda marca pa bida.
