E siman aki, esnan cu a forma parti di e programa special ‘Hende muhe, e ser resiliente’, a bini hunto riba Dia Internacional di Hende Muhe pa ricibi un regalo di aprecio pa nan participacion den e programa special aki.
Ta trata aki di sra. Erin Croes, propietario di Magic FM, sra.Anky Paesch-Chirino, propietario di Ricardo’s Restaurant & Bar, sra. Sharline Koolman hefe di Departamento di Malesanan Infeccioso di DVG, sra. Ronella Croes, CEO di ATA, sra. Vanessa Tjon-Kock, Korpschef di KPA y moderadornan sra. Nadien Phillip y sra. Irina Croes cu a haci e programa aki posibel.
E enfoke di e programa tabata pa pone atencion riba e trabou duro di cada un di e damanan aki na cabes di diferente organisacion y con nan a experencia e cambionan causa pa Covid. E impacto pa cada organisacion y/of sector tabata diferente, y esaki a wordo refleha tambe a traves di e entrevistanan. Locual sigur a resalta ta e habilidad di cada un dama pa por adapta reglanan, maneho, creatividad, cambia forma di traha y pa keda cu un bista positivo, a pesar di e retonan, pero tambe pa por a lidera y brinda e sentido di confiansa hasta den momentonan di incertidumbre. Sigur muestra di con nos hende muhenan realmente ta ‘E ser Resiliente’.
Minister-President Evelyn Wever-Croes como tambe Minister Xiomara Maduro a hiba palabra durante e atardi aki caminda nan a expresa nan aprecio na e damanan cu a conta nan storia di con nan a maneha e pandemia aki, tur for di perspectiva di cada un individualmente como hende muhe resiliente den nos comunidad.
Na final di e conbersacion, Minister Chris Romero, den nomber di Gobierno di Aruba, a entrega Prome Minister y Minister di Finansa un rama di flor como muestra di gradicimento pa nan trabounan duro y logronan realisa durante e pandemia aki y pa ta un ehempel berdaderamente di ta muhenan resiliente.
