Palm Beach – Diadomingo marduga pa mas o menos 12:45 a.m polis a wordo notifica di musica duro saliendo for di un apartamento na Palm Beach.
Un patruya den vecindario mesora a bay tira bista.
E apartamento tawata uno ariba pabou di Citgo Palm Beach, eynan lo tawata tin un fiesta grandi tumando luga.
Polis a bisanan pa stop e muziek, pero pa nan sorpresa nan a wordo ignora y e porta a wordo cera bek den nan cara.
Esaki a pone cu a pidi refuerso, mirando cu tawata trata di basta hende y e lo por bay sali for di man.
Den algun minuut varios patrouille a yega e sitio pa yuda e unico dos coleganan na e sitio.
Asina mes esnan den e apartamento no tawata worry cu e polisnan, y dado momento polisnan mester a cuminsa papia mas duro cu nan.
” Ami ta biba na Piedra Plat, tin toque de queda con bo kier mi yega mi cas” tawata reaccion di un persona den e apartamento. Pues aki nos por mira varios fiesta ta sigui wordo organisa clandestinamente y ta keda te 5’or di mainta, cu e pretexto cu tin TDQ y no por sali bay nan cas.
Di e manera aki burlando di autoridad y no manteniendo nan mes na e reglanan international di distanciamento social.
Esakinan ta tipo di personanan cu kizas no ta kere cu nos ta den un Pandemia y ta pensa cu nan lo por wordo contagia cu e virus mortal, cu ta wordo transmiti facil y principalmente den un area cera cu un monton di hende ariba otro.
Ora polis a pidi pa dos transportwagen e luz den nan cabes a cende cu detencion lo bay cay y e ora si tur hende a cuminsa sali y subi nan autonan y bandona e sitio.
E pregunta cardinal ta, doño di e apartamento of organisado di e fiesta a wordo multa si of no ?
Esaki no tawata e unico fiesta e diasabra pa diadomingo aki, tawata tin mas solamente cu no ta tur a wordo atendi manera debe ser.
Na Aruba te cu awor un total di 73 persona a fayece di Covid-19.
