Home Dutch Kingdom Husticia no ta usa e mesun midi pa huzga agentenan policial cu...

Husticia no ta usa e mesun midi pa huzga agentenan policial cu haya nan den problema.

SHARE

Rotterdam, Hulanda
UNDA GELIJKHEIDSBEGINSEL A KEDA
Manda mensahenan rasista y descriminatorio den chatgroup di polis ta permiti, pero un agente durante un asistencia a grita un persona pa ‘kutneger’ SI mester presenta dilanti hues.

No ta na Aruba so pero na Hulanda tambe husticia no ta uza e mesun liniaal pa huzga agentenan policial, esun cu nan gusta ta wordo previlegia y esun cu nan no gusta ta wordo persigui.

Mientras algun luna pasa 5 agente policial di Rotterdam, despues di a expresa nan mes den un forma hopi rasista den chatgroup di polis, sabiendo cu den e chat aki tabata tin varios otro colega cu ta desendiente di otro paisnan. E 5 agentenan aki SI no a perde nan trabou, pero solamente un warning nan a haya y mester a pidi despensa.

Durante zomer 2020, despues cu e 5 agentenan a mira un filmacion den cual algun mucha homber color scur a agredi un otro mucha homber color cla. E agentenan a cuminsa manda mensahenan hopi insultativo, descriminatorio y rasista den chatgroup di coleganan di polis, manera “kankervolk, kutafrikanen en pauperallochtonen’. lubidando cu den e chatgroup tin varios agente policial cu ta hende di color. E appsnan a lek y mesora a cuminsa cu un investigacion, na comienso di e investigacion tabata wordo bisa cu nan lo por perde nan trabou, pero recientemente a termina den solamente un warning y pidi despensa.

Pa un otro polis si no tabata tin un trato igual. December ultimo na Dordrecht un agente a insulta un persona yamando e ‘kutneger’, e agente aki si pronto lo mester parece dilanti hues y cu chens di perde su trabou.

Dordrecht, Hulanda: E incidente a tuma luga 5 di december 2020 den Beekmanstraat. E agente a wordo pidi pa un hoorzitting cu Ministerio Publico, pa motibo cu e agente no a bay di acuerdo cu e castigo den forma di un boet. E caso lo bay mas leu y segun vocero policial e mester presenta dilanti Hues.

E polis a bay un asistencia den Beekmanstraat na Dordrecht pa desordo di musica cu lo tabata sali for di un cas.
Na momento cu nan a yega na e cas, un homber a cuminsa haci fastioso, nan a pidi’e pa e bay for di eynan, e la bira razo y a cuminsa insulta un di e agentenan policial, mesora e la keda deteni.

E detencion di e homber aki a pone cu un pareha y nan yiu a bira razo, nan a cuminsa ataca y bringa cu e 3 polisnan.
Durante e bringamento un di e personanan tabata riba un agente policial femenina y e agente femenina a cuminsa sinti cu e ta bay stik y e la trata a saca su arma.
Un otro agente a logra primi e boton di emergencia di su portofoon pa pidi refuerzo. Maske cu e agentenan policial a uza varios biaha pepperspray, toch nan a wordo bati formalmente, te cu nan a keda herida.

Riba e camaranan di seguridad di e compleho di apartamento caminda e sucedido a tuma luga, a graba esaki for di comienso te na final. Riba e grabacion enberdad por a mira con e personanan aki a ataca y a bringa cu e tres agentenan policial, esaki segun Ministerio publico. Tambe riba e grabacion por mira con lihe refuerso a yega y a bin topa cu nan coleganan luchando ainda cu e agresornan.

E bureau Veiligheid, Integriteit en Klachten (VIK) di e unidad di Rotterdam, dirigi pa Ministerio Publico a cuminsa cu un investigacion relaciona cu e incidente aki. Segun Ministerio Publico, e violencia cu agentenan mester a uza tabata proporciona, esaki pa nan por a controla e situacion, pa motibo cu nan tabata wordo ataca di tur banda.

Como refuerso e agentenan a yuda pa controla e situacion bek, riba e grabacion por a scucha cu un agente policial a uza palabranan rasista contra un di e sospechosonan. Husticia a splica cu e situacion tabata hopi tenso, e tension halto por a wordo sinti, hopi palabranan insolete tabata cay. E insulto di e agente policial tabata dirigi na un persona cu no kier a laga los y no dirigi na un grupo di e poblacion. Pero no por descarta cu un agente policial su funcion ta uno ehemplar “VOORBEELDFUNCTIE” den e caso aki e agente a bay demasiado leu.

Segun Ministerio Publico, e agente a bisa cu ta duel su persona kiko e la bisa, pero no ta conoci ki dia e agente polical aki mester parece dilanti hues.

Enberdad tur polis nan funcion meste ta uno ejemplar VOORBEELDFUNCTIE, pero toch ta huzga un Si y e otro no. Mescos cu na Aruba, ta persigui agentenan policial cu aparentemente lo a duna informacion na prensa, pero na momento cu e alto comisario interino a duna un miembro di prensa informacion di crisis team via un voicenote y esaki a wordo manda rond Aruba , e SI no a wordo persigui pa husticia, encambio a haya un otro funcion halto.

Varios polis a yega di haya nan den problema, pero semper ta esun cu Husticia kier nan ta persigui. Agente policial den pasado cu a dal un mucha mata y tabata bou influencia,  otro agente haya drumi burachi den auto, sin lubida e agentenan di cierto departamentonan cu a wordo manda cas pa pendiente investigacion, tur a bay bek trabou, sin cu un musca a bula, muy probablemente tur e agentenan aki lo ta agentenan previlegia y Husticia no ta mishi cu nan. 

Voorbeeldfunctie na Aruba no tur ora ta aplicabel pa tur polis, core auto burachi, drumi burachi den auto, insulta prensa etc. ta permiti pa cierto agentenan policial so. 

Husticia na Hulanda y Aruba no ta midi cu e mesun midi.