E siman aki Dr. Horacio E. Oduber Hospital a haya su mes confronta cu coleganan cu a test positivo pa Covid-19. Di biaha HOH a cuminsa cu su “contact tracing” y a logra saca afo e origen di e cluster aki. E coleganan cu a test positivo ta den bon estado di salud y ta na cas den isolacion. Teniendo e siguridad di nos pashentnan y coleganan na prome luga a dicidi di cancela algun operacion ayera y awe. Diariamente ta evaluando e diferente operacionnan cu tin cu tuma luga hunto cu cu staf medico pa asina tuma desishonnan cu ta safe.
Lamentablemente e origen di e casonan positivo a resulta bishitantenan di pashent cu ta interna na HOH. Desde aña pasa a introduci diferente regla nobo den cuadro di Covid-19 pa asina protehe pashent y personal. Tempo ta pasa y mester menciona cu bishitantenan ta registra y drenta Hospital cu nan tapaboca pero ora nan ta den camber cu pashent no ta mantene distancia y ta kita tapaboca. Esaki tin como consecuencia cu pashent, sin sa, a wordo infecta cu Covid-19, y a pasa esaki pa algun colega den HOH.
Hospital un bes mas kier recorda tur hende cu e reglanan t’ey pa un motibo y esey ta pa protehe nos pashentnan y tambe nos personal. No ta permiti drenta Hospital sin tapaboca y semper keda haci uzo di handsanitizer cu tin ubica na diferente luga strategico na HOH.
Pashent interna cu Covid-19 no ta permiti pa ricibi bishita. Pashent interna (non-Covid-19) ta permiti solamente 1 (un) bishitante mayor di edad. E orario di bishita lo sosode na un orario fiho cu un duracion di 1 ora. E orario fiho aki lo ser comunica directamente cu e pashent/ bishitante pa asina por keda garantisa distanciamento social den cada camber. Y bishitante ta obliga di mantene e mask bisti henter ora cu e ta den HOH, pues no por kit’e ora di bishita den camber. Si un pashent cu covid-19 ta den fase terminal e lo por ricibi bishita di solamente casa y yiu(nan) pero semper den cooperacion cu e departamento concerni.
Hospital kier a manda palabra di bon recuperacion pa coleganan cu ta na cas y ta spera di por mira nan pronto bek na pia di trabou y den bon salud. Tambe Hospital kier pidi tur hende cooperacion pa asina hunto nos por sali for di e momento fastioso aki. Nos ta conta riba boso!