Tur cos ta cla pa yegada di e prome cargamento di vacuna Pronto Aruba lo cuminsa move den direccion di recuperacion

ORANJESTAD, Aruba –14 februari 2021: Segun planificacion e prome cargacion di vacuna Pfizer lo ta yegando Aruba otro siman. Ta trata aki di un cantidad di 11.700 dosies pa cuminsa vacuna nos comunidad.
Cuminsando dia 17 di februari te cu dia 21 di februari 2021 manera a wordo informa lo ta vacunando esnan cu ta traha of ta duna cuido. Aki ta referi na entre otro empleadonan di Hospital, IMSAN, DVG, Dokter di cas, Specialista, Enfermero(a),Personal di casnan di cuido, Dentista, fisioterapista y demas trahadornan den cuido.
Entrante 22 di februari 2021 lo cuminsa vacuna nos comunidad di 60+. Nos adulto mayor cu ta den casnan di cuido lo haya bishita di un team especial cu lo vacuna na e casnan di cuido, pashentnan drumi na cama (bedlegerig) famia por haci e peticion serca dokter di cas pa e team mobil por pasa na cas y vacuna e persona. E servicio aki ta unicamente pa pashent drumi na cama.
E prome dos localidadnan cu lo wordo habri pa cuminsa cu e vacunacion ta Centro Deportivo Libertador Betico Croes na Santa Cruz y Teresita Center na San Nicolas. E localidad na Santa Cruz a wordo diseña specialmente pa por brinda servicio special na nos adulto mayor, di manera cu nan no mester para hopi largo riba nan pianan. Unabez cu yega na e localidad nos grandinan lo por sinta y tur servicio lo yega sercanan na nan stoel. Pa esnan cu ta den rolstoel lo no tin problema tampoco.
E dia ta yegando, si ainda bo persona no a registra haci esaki ainda door di download e Aruba Heath App of pasa na cualkier edificio di MFA sea cu ta Savaneta, Santa Cruz, Paradera of Noord pa asistencia cu registracion. E siman cu ta sigui nos lo keda duna mas informacion riba e planificacion di e vacunanan. Aruba ban vacuna, esaki ta e solucion pa por sali for di e pandemia aki.