Polisnan man yen cu grupo di hoben den e area turistico, pa motibo cu nan a horta un bicicleta. Un di e hobennan a tira e bicicleta den lama y a trata na sconde den lama, pero polis a logra mir’e y a deten’e.
Eagle Beach: Diamars den careda di 9’or di anochi, Polis di strand tabata man yen cu un grupo di mucha hoben den e area di Low Rise Hotel. Polis tabata buscando un grupo di mas of menos tres pa cuater hoben cu mester a horta un bicicleta di e marca Trek den e area turistico.
E hobennan tabata den e area entre Divi Phoenix, Azure y Amsterdam Manor Beach Resort.
Un patruya cu tabata den cercania a bin topa cu e grupo aki den e area menciona, na momento cu e hobennan a mira polis nan a cuminsa core pa polis.
Mesora e patruya a pidi pa refuerso di nan coleganan di Noord, strand y Oranjestad. Un rato despues durante e buskeda un agente policial a bin topa cu e bicicleta horta benta den lama, tambe e la mira un di e hobennan aki ta trata na sconde den lama pa polis.
E hoben no por a haci mucho, pasobra polis a mir’e caba den lama algun meter leu di unda e la benta e bicicleta. E polisnan a confisca dos bicicleta, di cual un di nan tabata esun horta y e otro tabata di e hoben mes. E hoben cu a benta e bicicleta den lama y a bay sconde pa polis den lama a keda detene.
Un otro patruya a bin topa cu dos hoben mas, den cercania di Divi Phoenix hotel, e agentenan policial despues di a dunanan un bon skual, a tuma nan datosnan. Mientras un di e hobennan di e grupo aki a logra scapa di polis. E patruyanan a sigui busca den e area aki, pero no a logra topa cu ne.
E hoben cu a keda deteni a wordo hiba cu transportwagen di polis pa warda di polis, pa mas investigacion y duna cuenta di su actonan.
