Home Politics Prome Minister Evelyn Wever-Croes: ARUBA MESTER TA UNI PA HUNTO SIGUI...

Prome Minister Evelyn Wever-Croes: ARUBA MESTER TA UNI PA HUNTO SIGUI CUIDA NOS MES Y OTRONAN

SHARE

Diaranson anochi, na final di conferencia di prensa relaciona cu ultimo desaroyonan di Covid 19 na Aruba, Prome Minister a laga atras palabranan di curashamento y conscientisacion enfatisando un biaha mas e importancia pa cada ciudadano cuida su salud.

“E chens ta grandi cu un dia Covid ta yega y bati na bo porta tambe. Mirando e grado di contacto esaki lo no ta nada straño. Na momento cu esaki pasa, no mester bay den panico pero mester ta prepara. Si tin un hende cu a test positivo den cas y mester ser cuida pa esnan cu ta biba eynan, porfabor bay na e website arubacovid19.org pa por haña informacion con pa haci esaki corecto y cu cautela.

Mi ta pidi na esnan cu mester permanece den cuarentena y/of isolacion pa porfabor cumpli cu esaki pa evita di sali y plama e virus y pega otronan cu talves ta cuidando nan mes bon. No mester lubida cu tin multa pa esnan cu viola e regla di cuarentena y/of isolacion, y e taskforce nan ta hopi estricto den nan control. Tanten cu no tin e vacuna ainda, Aruba mester ta uni pa hunto sigui cuida nos mes y otronan. Tambe cada persona mester aplica e reglanan pa asina por garantisa e bienestar di pais Aruba.

Caminda nos ta para awe nos tawata aden caba, no un biaha sino dos biaha. Henter comunidad sa cu esaki lo a pasa y tambe kico mester haci aworaki.
Pa un siman tur hende tin cu hala faha mara pa asina por frena e plamamento. Tambe lo mester limita e movecionnan kedando paden mas tanto cu ta posibel y sali solamente si ta necesario. Kico ta necesario? Trabouw, scol, botica, supermercado y dokter ta cosnan necesario. Lo demas limita mas tanto posibel, por ehempel bishitanan. Porfabor bisti tapaboca constantemente ya cu esaki ta yuda salba abo y otronan tambe. Tanten e vacuna no wordo administra manera Gobierno tin pensa di administr’e, esaki lo sigui pasa na unda e casonan ta baha, bolbe subi y bolbe baha.

Gobierno tin un indicacion caba pa cu e vacuna y un plan con pa bay haci’e, pero no tin un plan concreto di ki dia ta haña tur e vacunanan p’asina por vacuna 50-70% di nos poblacion. Tambe ta importante pa bisa cu niun hende ta obliga pa tuma e vacuna sino lo ta a base di decision di cada persona. Mester ta consciente si cu esaki ta e unico solucion si pa por haña nos libertad bek y pa por sali di e crisis cu Aruba ta aden. Aruba ta un pueblo culto, civilisa y determina, nos tin un amor grandi pa nos pais y esaki ta e momento pa demostra esaki. Ban ciuda nos mes y e salud di otronan y nan bida pasobra nos ta stima nos mes, nos famia y nos ta stima Aruba”.