Recientemente Parlamento a trata un carta fecha 7 di December 2020, ricibi di Minister Glenbert Croes, caminda e ‘gevoelens’ di Parlamento ta keda pidi pa loke ta trata Sociaal Crisisplan (SCP). Un Plan cu a sa di demostra su importancia y necesidad mirando e crisis social cu Gabinete Wever-Croes a hereda di Gabinete Mike Eman I y II.
Pa ta concreto como parlamentario mi a bay di acuerdo pa Gobierno extende contratonan andando relaciona cu SCP y e re-alocacion di 10 miyon florin cu a keda retene pa motibo di COVID-19. Ta trata di contrato di alrededor di 60 personal necesario pa realisacion di e SCP. Funcionnan manera trahador social, verpleegkundige, psychiater, psicologo, beleidsmedewerker, raadsonderzoeker etc. cu ta sumamente necesario pa cu ehecucion di e social crisisplan na e manera aki cu aprobacion di Parlamento a por keda extendi y no lo termina mas fin di December 2020. Banda di e aspecto di personal, e re-alocacion di e 10 miyon sigur ta crucial pasobra realisacion di diferente proyecto importante ta depende di e fondo aki. Aki bou mi lo elabora riba algun.
- Family Justice Center: ta sumamente importante pa realisa e Family Justice Center den 2021, pasobra hopi mucha cu ta victima di violencia lo por wordo atende inmediatamente door di e instancia aki unda lo tin asistencia di un ‘forensische en vertrouwensarts’ cu lo trece mas prueba riba mesa pa asina Ministerio Publico por haci nan trabou mihor.
- Departamento di Mucha y Hoben: cu e placa aki lo lanta un Departamento di Mucha y Hoben (cu lo cay directamente bou Ministerio di Asunto Social) unda cu diferente leynan, manera esun di Meldpunt Kindermishandeling, Kinderopvang (unda tur creches nan lo wordo controla cu nan ta sigur pa nos muchanan) y Ouderschapplan (unda ta percura pa traha plan ora mayornan bay divorcia) lo bay cay, lo keda implementa y controla. E Departamento aki lo percura pa e leynan aki, cu lo bin na vigor den 2021, por wordo garantisa. E Inspectoria Social cu ta bay keda introduci tambe ta bay cay bou di e Departamento di Mucha y Hoben y lo tin como tarea principal pa percura pa guia y monitorea tur e leynan aki y e 120 crechenan na Aruba. Introduciendo e Departamento aki Aruba lo cumpli cu conseho di hopi instancia internacional cu pa basta aña caba ta bin ta indica cu Aruba mester bin cu un instancia gubernamental asina.
SCP ta un plan cu a keda crea cu un karakter temporal pero mirando tur e proyectonan aki riba menciona y tur esnan cu a keda implementa y ta den ehecucion caba, mi ta di opinion cu Gobierno mester cuminsa traha pa incorpora SCP den e presupuesto permanente di Pais Aruba. Banda cu e proyectonan di SCP ta necesario y urgente mas y mas a keda demostra cu nan karakter ta uno structural pa enberdad nos duna e atencion real na e problemanan social aki na nos Pais y pone hopi mas atencion na e parti di prevencion cu a largo plazo lo beneficia nos muchanan, famianan y Aruba completo.