Mi ta den comienso di mi 30 aña di edad y pa e ultimo shete aña mi a hayami cu e dilema di ta stima dos homber na mesun momento. Cada un ta unico den su manera di ta, pero tur dos ta amoroso, cariñoso y tur dos ta stimami. Mi tawata den un relacion cu e prome homber pa dos aña y despues mi a lage pa e di dos, cu kende mi tawata den un relacion pa cuater aña. Awor mi ta bek cu e prome, pero mi ta haya hopi falta mes di e di dos. Ta parce cu mi no por ta completamente felis cu un di nan so, pasobra mi ta haya hopi falta di e otro y mi ta sintimi culpabel pasobra mi ta sinti cu mi ta bezig ta hungando cu nan. Mi ta puntra mi mes si ta miho pa laga tur dos, pero mi sa cu esey lo kibra mi curason. Varios hende cu mi conoce ta bisami cu otronan ta soña so cu tipo di hombernan asina, y cu mi mester ta contento di tin dos bon homber cu ta stimami y cu mi por scoge for di nan. Mi sa cu mi tin hopi suerte, pero te ainda a resulta imposibel pa scoge y esaki ta haciendo mi daño. Mi no sa kiko ta e mihor manera pa pa trata cu e asunto aki. Mi ta preocupa cu hendenan lo bai husgami.
Contesta
Prome pregunta: Dicon bo mester scoge? Nos ta biba den un mundo diferente awendia. E normalidad di siglo 19 no ta aplicabel mas y si mundo ta un mihor lugar ora boso tres ta hunto, dicon no bai pe? Mi no sa kiko bo parehanan lo opina, pero kizas ta algo pa boso test. En todo caso ta importante pa ta habri y honesto cu nan dos, y p’esey mester inclui nan tur dos den e combersacion.”
Ora bo mira e daño cu parehanan ta haci otro ora nan kibra cu otro y den e paso kibra un famia completo, of forsa pa keda hunto a pesar cu cos no ta bai bon y nan no ta felis, bo ta cuminsa pensa si no a bira tempo pa re-examina nos modelo monogamo. Bo ta puntra bo mes si no a yega e otra pa stop di conforma na e sistema anticua aki cu den bida real pa mayoria hende no ta traha y ta pusha hende pa biba un dobel bida – caminda infidelidad ta na ordo di dia – of un bida – felis ariba Facebook y infelis den realidad – pa ‘cara di otronan’. Esaki ta e tristo realidad cu hopi hende ta biba aden, complaciendo tur otro hende menos nan mes.
Segun estadistica di edad, un relacion lo por dura shete decada. 70 aña ta un tempo sumamente largo pa soporta tur e carencianan. Un solo persona nunca lo bai por dunabo tur locual abo mester pa ta felis. Semper lo bo bai tin cu sacrifica cosnan cu ta importante pabo y e sacrificionan ey mes, pa chikito cu nan por mustra na cierto momento, a lo largo ta propaga insatisfaccion, infelicidad y resentimento.
Pues, si e dos personanan aki hunto ta forma bo homber ideal, ami lo considera seriamente pa – si nan tur dos ta di acuerdo cu esaki – purba un relacion cu nan tur dos. Honestidad ta e cos di mas importante den tur relacion. Pues, tambe den un eventual trio polyamoroso. Door di ta honesto cu nan dos tocante bo intencion, bo ta duna nan un ‘fair chance’ pa dicidi kiko nan kier haci cu nan bida. Si nan tur dos acepta pa ta den un relacion cubo, esaki lo ta bo situacion ideal. Y si no ta asina, bo lo tin di siña biba cu e decision aki, cu no ta den bo man.