Home Corte Homber cu a bringa cu Polis y menaza varios hende condena

Homber cu a bringa cu Polis y menaza varios hende condena

SHARE

 

ORANJESTAD – E homber J.R. awe mainta via video conference mester a duna cuenta pa e delitonan cu el a haci.

Aruba Native por a compronde cu e acusacionnan cu Fiscal a presenta contra J.R. ta cu riba 28 October 2020 a resisti contra su detencion y a bringa cu dos agente di Polis. E incidente aki a keda publica riba youtube caminda despues di e bringamento, J.R. a para keto y a bisa “ban warda awor”. Tambe Fiscal ta acusa J.R. cu na Juli 2019, el a menaza e homber L. kende tin un studio di grabacion.

Hues a cuminsa cu e caso di bringa cu Polis caminda el a mustra cu segun e relato di Polis, dia  28 October 2020 hendenan di DOW tabata haciendo un tereno limpi pero a wordo menaza door di J.R., kende no tabata di acuerdo. Polis a presenta na e lugar y a haya J.R. eynan. J.R. tabata hopi agresivo. Un agente a bay puntra J.R. kico tabata e problema. Nan a papia un rato y ora Polis kier a detene, el a dal e agentenan mokete den cara y a resisti contra su detencion. Segun J.R., Polis ta gaña riba dje. Hues a bisa cu e trahadornan di DOW tambe a mira con J.R. tabata bringa cu e agentenan di Polis. Segun J.R. nan tambe ta gaña.

Hues a mustra cu dia  26 Juli 2019, J.R. a menaza e homber L. Segun L. e tabata hunto cu su partner den un auto y J.R. a cuminsa grita nan. J.R. a bisa Hues cu e no conoce nan y no ta corda nada. Ta asina cu L. conoce J.R. pasobra nan ta bisiña di otro. J.R. lo a grita: “E biaha aki mi no lo basha bala riba payasonan di circo sino e doño di circo. E biaha aki si bo a pompa”. J.R. a desmenti di a bisa asina. Hues a mustra cu na Polis J.R. a bisa cu e no tin problema cu L. sino e mama di L. Ta asina cu L. ta biba na cas di su mama. J.R. a bisa Polis cu e tin molester di desorden di musica y e no kier pa despues cu tin grabacion, hendenan ta keda rond haci molester.

Hues a bisa cu tin un raport di Reclasering di Augustus 2019 caminda a papia cu J.R. Reclasering a constata cu J.R. tin problema di caracter violento. Reclasering ta haya cu J.R. mester di ayudo pa sa con pa anda cu situacionnan fastioso. Nan ta recomenda pa laga psyhiater evalua J.R. J.R. a bisa Hues cu e no tin mester di ayudo y cu ta Reclasering mester di psychiater, no e.

Hues a mustra cu J.R. tin un carchi castigo cu diferente caso di violencia. Na 2011 el a wordo condena pa a mata y tin diferente caso di violencia.

Abogado mr. Croes a bisa Hues cu su cliente L. y su famia ta sinti nan mes menaza y teroriza pa J.R. E ta cana anochi den cura di hendenan den vecindario. Door di e menazanan aki, hopi di clientenan di L. no ta bay anochi pa grabacion. E abogado a bisa cu J.R. tin e vecindario teroriza. El a demanda mas cu 28 mil florin.

Fiscal a bisa cu e ta haya legalmente proba cu J.R. a bringa cu agentenan di Polis na momento di su detencion. Ademas e menaza verbal contra L. tambe ta proba, aunke cu J.R. ta desmenti. Na opinion di Fiscal, ta parce cu J.R. tin temperament halto manera Reclasering ta mustra. Fiscal ta haya cu e actitud di J.R. ta haci cu e lo no bay sigui instruccionnan di Reclasering. Pesey e no ta haya necesario pa pone J.R. bou guia di Reclasering. El a exigi 5 luna di prison di cual 1 luna ta condicional cu un tempo di prueba 2 aña. Pa loke ta e demanda di daño, Fiscal ta haya cu no tin bista cla kico realmente ta e daño. El a pidi pa declara e demanda no admisibel y a pidi Hues aproba 500 florin di daño material.

Hues a sera tratamento di e caso y a dicta sentencia di biaha. Hues ta haya legalmente proba cu dia 28 October 2020, J.R. a maltrata dos agente di Polis durante su detencion. Pa loke ta 26 Juli 2019, Hues ta haya legalmente proba e menaza di L. y pareha. Hues a bisa cu e ta preocupa pa cu e actitud di J.R., mirando su carchi di castigo, raport di Reclasering. Hues a bisa cu bisiñanan ta wordo menaza y tin miedo cu J.R. lo haci algo contra nan. Hues a bisa cu e ta comparti punto di bista di Fiscal cu no tin base pa laga Reclasering atende cu J.R. mirando cu J.R. mes a bisa cu e no kier ayudo. Hues a condena J.R. na 4 luna di prison di cual 1 luna ta condicional, cu un tempor di prueba di 2 aña. Hues a pone condicion special cu J.R. ta prohibi pa tin contacto cu bisiña. Hues ta haya e demanda di daño hopi fastioso y a declara no admisibel. El a bisa cu lo mester haci caso civil.