Desde diadomingo trucknan ta transportando vacuna contra covid pa henter Estados Unidos

E prome trucknan cu ta reparti e vacunanan pa uzo di emergencia a cuminsa sali for di e fabrica di Pfizer na Portage (Michigan, Estados Unidos) cu e prome dosis di vacunanan contra covid-19, cu nan lo hiba na nan destino den ful e pais cuminsando dialuna, pa vacuna esnan den gruponan di riesgo.
Fedex y UPS ta colaborando y operando hunto pa facilita e distribucion di e vacunanan cu mester wordo teni bou temperatura hopi friu durante ful e transporte.
Segun e hefe di e Operacion Warp Speed, e general di ehercito, Gus Perna, e prome vacunanan mester yega nan dialuna na 145 di e 600 lugarnan di vacunacion estableci.
E resto di lugarnan lo ricibi e vacunanan algun dia despues pa por cuminsa vacuna esnan cu tin prioridad: hendenan cu ta biba of traha den residencianan di anciano y frontliners, cu ta expone nan mes diariamente na e enfermedad.
Casi 3 miyon di dosis lo ta saliendo di e fabricanan di Pfizer na Michigan y Wisconsin, y esaki ainda no lo ta suficiente pa cubri e necesidad di tur esnan cu tin mas urgencia.
No obstante, gobierno Mericano ta spera cu e cadena de produccion y distribucion lo ta constante, pa por zorg pa na fin di aña 2020 40 miyon di dosis di e vacuna por wordo administra, pa asina inmunisa por lo menos 20 miyon di hende cu un vacuna cu ta rekeri dos inyeccion separa den un periodo di tres siman.
Esaki ta e comienso di e campaña di vacunacion mas grandi den e historia di Estados Unidos y di mundo – cinco paises ya caba ta administrando e vacuna di Pfizer- pa combati un pandemia cu na Estados Unidos a ocasiona casi 300.000 morto y den mundo henter mas di 1,6 miyon.