Tur cos ta sera, lockdown te cu 19 di januari. Ayo Pasco y Aña Nobo

DEN HAAG – E gabinete ta preparando pa un lockdown extenso caminda casi tur establecimento lo ta sera te cu 19 di januari: di scolnan te na tiendanan no-esencial, te na museonan, beauty salon y teatronan, segun fuentenan.
E medidanan aki a bai na vigor awe nochi 12 or, pa evita aglomeracion di ultimo ora den tiendanan. Profesionnan di contacto manera barberonan y salonnan di massage tambe mester sera. Tin algun excepcion pa profesionnan di contacto den area medico, entre otro fysioterapeuta, cu mag di sigui traha. Tur otro hende mester keda cas mas hopi posibel.
Scolnan, tanto basico como avansa, mester sera nan portanan desde diaranson y bai online. Crechenan tambe mester sera. Solamente pa mayornan cu profesionnan vital, e scolnan basico y crechenan lo mester keda habri.
Banda di esaki, e establecimentonan na unda por spera aglomeracion, manera museo, dierentuin, parkenan di recreacion y en piscinanan lo sera. Esaki ta conta tambe pa gym.
Restaurantnan y café nan tawata sera caba desde 14 di oktober. Horeca mag di ta habri solamente pa hende por pasa busca cuminda. Hotelnan tambe mag di keda habri, pero no mag di sirbi cuminda ni bebida. Misanan tambe mag di keda habri.
Motibo pa e medidanan cu ta bai mas leu cu e lockdown durante e prome ola, ta e hecho cu e cantidad di contagio ta keda subi. E gabinete tawata spera di por baha e cantidad di contagio pa 3.600, pero e ultimo dianan esaki a keda na e nivel di di 10.000.