E futbolista Quincy Promes di 28 aña, a wordo deteni diadomingo pa polis, esaki relaciona cu un incidente hopi serio cu a tuma lugar na Juli ultimo.
Amsterdam, Hulanda: Diadomingo den oranan di mainta e futbolista a wordo deteni, door di polis riba sospecho di ta envolvi den un caso serio di hincamento. E incidente aki lo a tuma luga durante un fiesta di famia den un Loods na Abcoude cu ta den e provincia di Utrecht, pero ta keda hopi cerca di Amsterdam Zuid Oost. Aki ta caminda cu e lo a hay’e den problema y aparentemente lo a hinca su primo.
Quincy Promes ta un hungado prominente na Hulanda, e la hunga pa Spartak Moskou y a yega di sali futbolista di aña na Russia. Den su carera como futbolista e la yega di hunga pa e Clubnan FC Twente y Go Ahead Eagles. Actualmente e ta hungando den e division di honor pa Ajax. Diasabra anochi mes Quincy a hunga den e partido di Futbol, den cual su team Ajax a gana PEC Zwolle 4-0. Segun nos a compronde cu na aña 2015, Quincy tabata tin un entrada di 3 miyon Euro pa aña, cu ta equivalente na 6.5 miyon florin.
E futbolista di 28 ana a keda deteni pa supuesto maltratonan fisico hopi severo. Pa e delito aki tin un castigo di prison di maximo 4 ana. Mientras tanto investigacion di e caso di aki ta continua.
Segun e abogado di e primo, Abogado Yehudi Moszkowicz, Quincy lo a hinca e primo net bou di su rudia y tambe e abogado a bisa cu tabata tin varios testigo.
Di otro banda e abogado di Quincy a informa ANP cu Quincy Promes ta desmenti su envolvimento den e caso di hincamento aki, su abogado Manon Aalmoes a bisa tambe cu durante e incidente Promes no tabata ni presente y cu Quincy lo por keda te dialuna deteni.