Den transcurso di siman pasa y den fin di siman nos a tuma nota di apertura di un container park na Playa, cu ta basa den un sitio di entretenimento. Riba su mes nada contra cualkier desaroyo asina, pero toch mirando cu nos ta memey di un pandemia, henter e apertura cu a tuma lugar ta pone nos bin cu cierto “questionmarks” tocante e establecimento aki.
Esakinan nos di UPP ta haci, mas aun mirando cu gobierno y particularmente sra. Evelyn Croes, como Prome Minister, constantemente ta purba na duna aviso- y consehonan, mescos cu demas autoridadnan, pa nos ta mas consciente y evita cualkier forma di aglomeracion y “bochincha”, pa asina minimalisa e riesgo di contagio di COVID-19.
Mientras cu siman pasa ainda, na momento cu nos a conoce un leve aumento di e casonan di contagio atrobe, gobierno y crisis-team a implementa extra medidanan, pa asina purba di contene un supuesto aumento, nos ta mira cu di otro banda gobierno y nos demas autoridadnan a permiti un sitio nobo, un parke di entretenimento nobo habri, na unda cu varios reglanan impone pa gobierno no a wordo manteni. E.o. e aglomeracion, bailamento, distancia social di menos cu 1.5 meter, y bebemento formal, no uzo di tapaboca y Dios sa kico mas! Pues un incumplimento total.
Esaki ta pone nos puntra dicon tin asina tanto reglanan pa otro establecimentonan, manera restaurantnan, rumshopnan cu no por habri, oficina di Lotto cu mester cera 6.30, entiero cu 30 hende paden, cu no ta permiti festivalnan navideño ni nos Dande, fiestanan den famia cu tambe reglamentonan, etc., anto na e sitio aki parce cu no tin ley ni regla ta conta. Sigur si observa e fotonan y videonan cu a circula den fin di siman, e sitio aki tabata tin mas cu 60 hende, pues un prome regla caba di incumplimento.
Asina nos a bin comprende cu ta trata aki di un VBA yama “Bochincha Container Yard”, cu su director un tal Otmar, y cu a wordo lanta na juli 2020, cu den apenas 5 luna por a habri porta di su establecimento.
Pesey tambe nos ta puntra ki sorto di vergunning e compania aki a haya? Ki tempo el a pidi su vergunning pa operacion y con liher esaki a keda otorga? Ki reglamentonan di “bouw-vergunning” a tene cuenta aki cu ne? E parke di container aki, tin rekisito di DOW? E construccion a wordo controla pa DOW y otro instancianan manera DTI, DVG, Brandweer? Nos sa cu tin un fenomeno di construccion di vivienda estilo container aki na Aruba. Kico ta haci pa pone regla pa loke ta uzo di container asina?
Ki tin di berdad cu te hasta “overtime” Elmar a traha pa por a caba cu tur trabou pa e asina ey e lugar habri e siman cu a pasa? Of aki tambe por papia di un “free for all”? Con e seguridad ta hinca den otro, manera p.e. den caso di un calamidad (horcan)? Rampenbestrijding a wordo envolvi?
Cua ministernan a coopera pa e ex-minister aki haya tur su permisonan den 3 luna? Awor cu e establecimento a habri, ta pesey ta bay flexibilisa e medidanan di COVID-19 pa asina e negoshi aki por draai manera cu nos lo NO ta memey di un pandemia? Santa Claus parce no ta haci wega den e pandemia aki. Con gobierno por tolera tur esaki?
Apesar di e supuesto retiro, e Scorpion parce di ta “omnipotente” aki na Aruba, y cu e por haci loke el ta haciendo. Kizas esaki ta un otro forma pa laba placa den un corto tempo na un manera barata? Sigur si nos mira cu esnan ta den touw pa haya e referineria di Aruba, tambe ta cu e Scorpion nan lo a deal?
Loke ta pasando na Aruba, ta pone nos corda riba e biljonario Jeffrey Epstein, cu tabata asina omnipotente, cu despues di a wordo aresta y a bay “on probation”, prome cos cu el a haci ta organisa un fiesta grandi, unda cu tur esnan “famoso y conoci cu posicion” a acudi na e fiesta, a sabiendas di tur e fechorianan cu e elemento aki a comete.
Aki na Aruba parce cu nos situacion ta casi identico, esta cu memey di un serie di acusacion contra e ex-minister, parce cu e por regla pa haya tur cos, y cu e bochincha sigui aki na Aruba, manera e ta dirigi esaki! E hecho cu e Scorpion ta sigui cu su fiesta, ta muestra cu na grandi e ta haci mofa di nos Ministerio Publico, cu no tin fin tampoco pa termina e casonan cu ta wordo investiga. Al final lo “get away” di tur e acusacionnan? Ki dia lo caba cu e “BOCHINCHINAN” aki?
Partido UPP
Booshi Wever
13 di december 2020