#Sushi mester ser procesa na un manera sostenibel
Den cuadro di dia Nacional y Internacional di Derecho di mucha y den cuadro di e proyecto #MyNewWorld di Unicef Nederland, hobenan di Aruba a debati cu hobenan di Bonaire y Curacao tocante diferente ponencia.
Durante un rueda di prensa di Minister President di Hulanda Mark Rutte, e minister a vocivera cu gobiernonan mester bai scucha e stem di e mucha y hoben mas y asina yega na solucionan sostenibel pa diferente retonan cu nos paisnan por ta encontrado. Esaki a haci cu UNICEF Nederland a crea e proyecto #MyNewWorld. #MyNewWold ta ser organisa na Hulanda, Curacao, Bonaire, St. Maarten, St. Eustatius, Saba y Aruba. Na Aruba Unicef Nederland a aserka Fundacion Telefon pa Hubentud Aruba pa realisa e proyecto aki pa nan.
Na Aruba a selecta 8 hoben di entre 14 pa 18 aña cu ta bishita scol secundario pa participa na #MyNewWorld. Ta trata di 4 cabayero y 4 dama cu ta bin di diferente districto di Aruba y for di diferente etnicidad. E hobenan participando na #MyNewWorld ta: Ariany de Weever, Daniel Jones, Giovanna Carisal, Loui-Angelo Bislick, Jean Croes, Jordan Peterson, Shaneidee Rosaria y Sherona Manuela.
Despues cu e hobenan a bin hunto pa delibera kiko segun nan ta retonan di pais Aruba y tambe presenta posibel solucionan, nan a ricibi training di con pa debati. Ariba 20 di november, dia Nacional y Internacional di Derecho di mucha, e hobenan di Aruba a debati den un manera virtual cu hobenan di Bonaire y Curacao. E debate den forma virtual a tuma lugar desde e studio di Telearuba. Primeramente e hobenan di Aruba tawata opositor di e ponencia di Bonaire cu ta bisa cu problema di salud mental di hoben mester ser trata na scol. Despues Aruba mester a defende su ponencia cu ta bisa cu sushi mester ser procesa na un manera sostenibel. Tambe e hobenan di Aruba a fungi como hurado durante e debate entre Bonaire y Curacao.
E debate a bai den bon ambiente y cu respet pa otro. Tambe e hobenan a siña hopi di otro. Unicef Nederland y Fundacion Telefon pa Hubentud Aruba ta sumamente orguyoso di e hobenan cu a representa Aruba.
Siguientemente e hobenan di Aruba lo tin un combersacion cu Minister President di Aruba Evelyn Wever-Croes y Minister di Asuntonan Social Glenbert Croes, caminda nan lo ta entregando un raport cu nan consehonan. Di e manera aki e hobenan ta haciendo uso di nan Derecho di Participacion manera e ta ancra den articulo 12 y 13 di e Tratado Internacional di Derecho di Mucha.
Pa mas informacion tocante #MyNewWorld por tuma contacto cu Fundacion Telefon pa Hubentud Aruba via nos website: 131.aw, facebook: https://www.facebook.com/telefon.hubentud/, email: [email protected] of telefon 5886138.
