Dialuna atardi a duna inicio na un siman importante pa loke ta e bienestar di muchanan y hobennan di Aruba.
Desde inicio di e gobernacion aki, e bienestar di nos muchanan ta prioridad di maneho di Gabinete Evelyn Wever-Croes y muy en especial di Ministerio di Asuntonan Social y Labor. Concientizacion y educacion tocante lantamento di nos yuinan sigur ta un parti importante di e maneho aki.
Aruba hunto cu e demas islanan den Caribe Hulandes ta forma parti di e Taskforce di Derechonan di Mucha den Reino Hulandes. E Taskforce aki tin e tarea pa atende topiconan importante pa e islanan den un forma colectivo.
Un di e temanan cu sigur kier promove ta e bienestar di nos muchanan riba tur e islanan enfokando riba Lantamento di Mucha den un ambiente di siguridad, amor y cariño. Pa es motibo aki a lanta e “Comision Pedagogico” cu ta encarga pa realisa e Vision Pedagogico di Aruba.
E instancianan cu ta forma parti di e “Comision Vision Pedagogico Aruba” ta:
- Tienda di Educacion
- Fundacion Respeta Mi
- Fundacion Pa Nos Muchanan
- Stichting Wit Gele Kruis
- Departamento di Asunto Social.
Banda di e comision pedagogico, tin un plataforma grandi di organisacionan cu ta sostene e trabou y e vision pedagogico.
Asina desde 2018 Aruba, mescos cu e otro paisnan den Reino Hulandes, a cuminsa pone extra atencion riba e tema di lantamento di mucha pa medio di e “Siman di Lantamento di Mucha”, loke nan ta yama “Opvoedweek” na Hulanda.
Gobierno a scohe e siman aki, door cu e ta inclui e fecha 20 di november cu ta “Dia Internacional di Derecho di Mucha”.
Dialuna 16 di november 2020 a toca mi e honor pa inaugura e di tercer “Siman di Lantamento di Mucha” na Aruba.
E “Siman di Lantamento di Mucha” ta continua te cu 25 di november, unda e enfoke di e aña aki ta ariba e mayornan. Lo presenta dos curso interesante cu lo ser ofreci aki mes na e Centro pa Hoben y Famia. Esaki lo continua durante weekend cu diferente actividadnan cu e enfoke ariba nos muchanan, hobennan y nan famia. Otro siman lo continua cu e Conferencia di e Taskforce di Reino Hulandes riba temanan interesante pa e profesionalnan den veld.
Un gradicimento na tur miembronan di “Comision Vision Pedagogico Aruba”, demas partners y instancianan cu ta organisa e diferente sesionnan durante e bunita siman aki. Un gradicimento tambe na Sociaal Crisis Plan cu ta sostene “Comision Vision Pedagogico Aruba”.
Mi ta termina enfatisando e importancia di nos muchanan y famianan ya cu nan ta fundeshi di nos comunidad. Ademas un saludo caluroso na tur e profesionalnan cu dia den y dia afo ta dedica na e importante labor den e veld aki.
Mi ta desea tur participante un exitoso Siman di Lantamento di Mucha.
Cu esaki oficialmente mi ta inaugura “Siman di Lantamento di Mucha 2020”.
