Otro hendenan no ta hayami atractivo, mi mester haci mas esfuerso?

Mi ta un muher di 63 aña. Mas o menos 10 aña pasa, mi a realisa cu otro hendenan no ta hayami atractivo. Mi tawata tin algun pareha den mi bida, pero niun di nan a bira algo permanente. Recenientemente mi a conclui cu e chance di bolbe tin un relacion intimo lo ta chikito, pues mi a enfoka pa contrui un bon bida pa mi mes.
Mi a wak bek y a re-evalua hopi mal experiencia cu a afecta mi na manera negativo, manera un curso di canto den cual un di e mucha muhernan a haya hopi atencion di e lider. Mas laat den e curso e lider tawata hopi impresiona ora ela haya sa cu mi tin un bon voz pa canto. Pa un muher no-atractivo ta mas dificil pa wordo scucha. Mi ta puntra mi mes con diferente mi bida lo tawata si mi tawata mas bunita.
Mi no ta kere cu mi no ta atractivo, mas bien mi ta invisibel. (esaki no tin di haber cu edad, semper mi tawata). Mi ta keto y tin hopi motibo pa esaki. Pero tur e reaccionnan chikito cu mi a ricibi desde mi infancia, por a hunga un rol: Hende lo pone menos atencion na hendenan menos atractivo.
Semper mi a gusta mi style. Mi ta wak mi mes como jong, energetico y cu basta estilo. Pero mi ta worry cu otronan ta pensa cu mi ta slordig. Ta dificil pa papia cu amigonan tocante esaki. Of nan tin berguensa, of nan ta demasiado positivo y ta enfatisa mi cualidadnan. Un pregunta ta, si mi mester haci mas esfuerso pa locual ta trata mi cabey y make-up.
Contesta:
Mientras cu hendenan atractivo por tin un bida mas facil, nan tambe por tin cierto prejuicio contra nan. Y mi ta sigur cu bo conoce hendenan cu no ta convencionalmente atractivo, pero cu tin un personalidad asina magnetico cu tur hende ta ripara esaki. Y tambe tin un diferencia entre ta atractivo y ta sexy. Kizas bo ta compara atraccion fisico cu atraccion seuxal. No necesariamente nan ta e mesun cos.
Prof Alessandra Lemma, psychologa y psychoanalysta a splica e diferencia: “Bo por tin un hende cu ta sumamente bunita, pero cu no ta sexy, pasobra algo den nan sexualidad no ta completamente integra.” Esaki por tin diferente motibo, y kizas ta mucho complica pa splica, pero e por bin di e manera con nan a wordo lanta, y nan experiencia cu sexualidad tempo nan tawata mas jong.
Bo ta menciona e hecho di ta sintibo invisibel. Lemma a splica cu e manera con nos ta experiencia nos curpa y nos mes ta wordo forma hopi tempran”. Lemma ta puntra su mes kiko a pasa ora bo tawata creciendo. “Kizas bo a internalisa algo cu bo no por splica [ainda] tocante bo curpa. Nos ta internalisa reaccion di otronan, y esaki no tin nada di haber cu beyesa obhetivo, pero mas bien cu nos manera di sinti como persona y particularmente e pregunta si nos ta sinti cu nos merece atencion. Esaki ta e diferencia entre mustra atractivo y sinti atractivo.” Lemma a sugeri pa pone mas atencion na e “invisibilidad di cual bo ta papia, cu na e manera con bo ta mustra fisicamente.”
Den e cuadro aki, e combersacion tocante cabey y make-up of bo estilo ta un smokescreen pa locual berdaderamente ta pasando aki. E pregunta cu bo mester haci, ta unda y dicon bo a siña di ta keto y invisibel. Esaki ta algo cu terapia por yudabo cune pasobra, manera bo mes a bisa, amigonan no ta e personanan mas indica pa explora esaki cubo.
Ta bon pa enfoka ariba un bon bida sin un pareha, pero no tin motibo pa bo descata e posibilidad di un relacion. Pero prome: Abo. Bo tin un bos. Bo a uze y nos a scucha. Mi ta kere bo a inicia algo hopi importante.