Mucha homber di 4 aña a perde ambos mayor pa motibo di coronavirus

SAN ANTONIO – Raiden, un mucha homber di 4 aña a perde den 100 dia di tempo, tur su 2 mayornan pa motibo di coronavirus. E tata di Raiden, un homber di 33 aña, a contagia cu e virus na juni y a muri despues di algun siman den intensive care. Despues di un periodo cortico di rouw, e mama di e mucha tambe a bira malo. Un dia despues di a constata e virus e mama tambe a fayece den hospital, na edad di 29 aña.
E drama familiar a tuma lugar na San Antonio den e estado Mericano di Texas. Pa mustra e impacto di coronavirus y conta nan storia, e famia di Raiden a tuma contacto cu prensa. „Raiden a keda su so. Esaki ta hopi dificil”, e wela di e mucha a bisa.
Dentro di algun dia Raiden ta cumpli 5 aña. „E ta hopi tristo pasobra su mayornan no lo tey pa celebra cune”, un miembro di famia a bisa NBC News. Pa ta sigur cu e cumpleaños di Raiden ta bira inolvidabel, e famia a organisa un crowdfunding. Mientrastanto esaki a genera 26.000 dollar.
E famia ta pidi tur hende pa bisti mondkapje. „Nos sa cuanto dolor e pandemia aki a trece cune, pues nos kier enfatisa esaki”.