ORANJESTAD – Diahuebs merdia Minister di Salubridad Publico Sr. Dangui Oduber a bay ImSan pa un ceremonia di e 100 pashent cu a haya radioterapia na e centro medico na San Nicolas. Ainda por recorda cu dia 2 di april di e aña aki e afdeling di radiotherapia a trata nan prome pashent. Un proyecto cu e gobierno aki a kere aden, a pone fondonan disponibel cu awor ta keda cristalisa.
Esaki ta nifica cu pashentnan residencia aki na Aruba no lo mester bai mas den exterior pa esaki. Esaki ta significa cu e pashentnan lo keda den su seno familiar. Na mes momento esaki lo reduci e costonan di AZV pa cu pashentnan cu ta wordo manda den exterior pa tratamento di radiologia.
Minister Oduber a anuncia tambe cu a pone 1 miyon florin di AZV disponibel pa percura pa e 12 cambernan den ImSan bai den uzo pa pashentnan por pasa anochi na e centro medico. ImSan lo haya 22 camber extra total y dentro di poco ImSan lo haya su JCI accreditation cu lo significa cu nos lo cuminsa cu turismo medico. Di e manera aki Gobierno ta keda mustra cu hechos cu e ta kere den e desaroyo di San Nicolas.
Nos maneho di salud publico ta dirigi riba mehora e calidad di cuido y servicio. Cu e logra aki nos ta logrando mehoracion den cuido pa nos hendenan. Imsan su vision y su desaroyonan pa cu cuido medico ta cuadra cu e vision di Gobierno di Aruba cu ta pa mehora e calidad di cuido na Aruba y como tambe crea un plan sostenibel pa Aruba pa asina e fondonan di AZV ta sostenibel pa den futuro. Mirando e crisis cu nos ta aden aworaki, sigur esaki ta caminda cu nos por reduci e gastonan di AZV. Tur esaki sigur ta cuadra cu vision di nos Gobierno.
Minister Dangui Oduber den nomber di Gobierno kier felicita e visionario Dr.Joel Rajnherc y full team di ImSan Aruba y partners Di Miami Cancer Institute y Baptist Health. Awe ImSan a marca historia un biaha mas.
E “milestone” aki ta uno historico pa cuido medico y cu nos tur na Aruba mester ta orguyoso di dje.
Nos ta Transformando cuido medico na Aruba pa un mihor cuido, calidad y servicio. Nos ta kere den e desaroyo di San Nicolas. Cu accionan y decisionan concreto nos ta logrando cambionan positivo pa cuido medico na Aruba.
