AVP: Hubert Dirksz, president di FTA riba sesionnan di brainstorming… “Haciendo realmente un dialogo riba cada tema ta sumamente bon”

ORANJESTAD – Federacion di Trahadornan di Aruba (FTA) tabata un di e participantenan durante e edicion mas reciente di e sesionnan di brainstorm ‘Scucha, Pensa, Recupera Miho’. Specificamente tabata e di dos sesion di ‘Turismo den Perspectiva’ caminda riba invitacion di Partido di Pueblo Aruba (AVP), a sinta na mesa hunto cu representantenan di sector hotelero, timeshare y companianan di taxi.
E obhetivo di e encuentro tabata pa dialoga riba e perspectiva cu cada un tin pa cu e retonan pa turismo, economia y mercado laboral. Tambe AVP a scucha for di cada un, kico ta recomendacionnan cu nan tin pa Aruba por recupera mihor for di e situacion actual. President di FTA, Hubert Dirksz a indica cu pa nan, e participacion di e sindicato tabata importante paso mester papia riba kico ta e miho cos pa haci pa sali bon bek y ma lihe posibel.
“Otro aña nos ta den una aña di eleccion. Semper di parti di FTA, nos ta trece nos puntonan dilanti pa tur e partidonan politico; y den e caso aki pa partido AVP. Haciendo esaki dor, di realmente un dialogo riba cada tema, ta sumamente bon. Na cierto momento ta e mesun puntonan cu nos por pone por escrito, pero den e caso aki nos ta intercambia,” asina Dirksz a comenta.
E punto principal cu e sindicato a trece dilanti durante e sesion ta cu nan no ta wak e necesidad pa bin cu flexibilisacion laboral. “Si bo tin leynan cu ta funciona, no tin motibo pa trece cambio y den un cuadro di felixibilisacion,” e sindicalista a idnica. Ta teme cu un flexibilisacion di e leynan laboral por nifica un daño grandi pa e situacion social di e trahadornan.
E serie di sesionnan di brainstorm lo continua durante e proximo simannan cubriendo diferente otro aspectonan di nos comunidad manera educacion y justicia. E delegacion di AVP consistiendo di lider mr. Mike Eman, Jennifer Arends-Reyes, mr. Gerlie Croes, mr. drs. Richard Arends y drs. Gervais ‘Rene’ Herde tabatin oportunidad di haci pregunta. A base di tur informacion lo elabora plannan cu den futuro cercano of medio por contribui na e maneho di nos pais.