ORANJESTAD, ARUBA – Luna pasa, nada menos cu e tan reconoci doño y CEO di Bucuti & Tara Beach Resort – Sr. Ewald Biemans – a wordo introduci den e Hunta di Supervision di Fundacion Parke Nacional Aruba (FPNA). Cu esaki, e hunta di FPNA ta casi completo y cla pa e retonan cu tin den e futuro sercano: incluyendo e continuacion di profesionalisacion y e capacidad di recupera di e organisacion, y tambe e realisacion di proyectonan ambicioso pa conservacion y maneho di naturalesa, y sostenibilidad.
Sr. Bieman pa decadanan a maneha Bucuti & Tara Beach Resort. Abou di su liderasco, e propiedad aki a wordo nombra na 2016 e hotel mas sostenibel di mundo como un Green Globe Platinum resort. Na 2020, e resort a ricibi e puntuacion maximo di Green Globe; un certification di turismo sostenibel. Tambe Bucuti & Tara Beach Resort ta e prome hotel den Caribe cu ta CO2-neutral. Luna pasa Bucuti & Tara Beach Resort a bira e prome hotel pa ricibi e premio prestigioso di Nacionan Uni 2020 Climate Action Award. Biemans como un persona progresivo a indica di kier haci e propiedad “carbon negative”.
Sr. Biemans tabata den pasado un miembro di e hunta di Fundacion Parke Nacional Arikok, operando desde 2017 bou di number nobo: Fundacion Parke Nacional Aruba. Su conocemento y experiencia tabata instrumental den creacion di Parke Nacional Arikok. Awor sin duda Sr. Biemans lo bai tin e rol importante den e transicion di FPNA den un organisacion mas sostenibel cu tin e meta di logra “low-impact”. FPNA ta spera cu pronto por yama bon bini na e di cinco miembro di e Hunta di Supervision y asina aki e hunta lo ta completo.
Fundacion Parke Nacional Aruba
FPNA ta un fundacion independiente, cu desde 2003 ta maneha un parti grandi di Aruba su naturalesa den nomber di gobierno. E fundacion ta opera bou di un Hunta di Supervision profesional y un Hunta di Maneho diario, di acuerdo cu e standardnan di Good Corporate Governance.
E actividadnan principal di FPNA ta:
- maneha, proteha, restaura y desaroya e areanan natural den cuadro di desaroyo sostenibel y cu un bista riba biodiversidad;
- conduci maneho di bishitante sostenibel den e areanan di maneho;
- conduci investigacionan scientifico y aplica;
- provee informacion y organisa, sostene y promove actividadnan y proyectonan educacional;
- duna conseho sigun peticion of riba propio iniciativa riba proyectonan y desaroyonan cu tin un caracter directo of indirecto cu naturalesa;
- colabora cu organisacionan y personanan cu ta activo ariba mes un tereno.
Te cu na final di 2019, FPNA tabata maneha Parke Nacional Arikok y e sitio Ramsar Spaans Lagoen (hunto cu Rooi Frances, Rooi Bringamosa y Rooi Taki). Na 2019, e recien estableci parke marino tambe e wordo asigna bou di e maneho di FPNA y na 2020 a ricibi adicionalmente 13 area natural.
Parke Nacional Arikok y e centro di bishitante di e parke ta habri diariamente for di 8.00 AM – 4.00 PM. Bishita www.arubanationalpark.org pa mas informacion di FPNA y e diferente areanan di maneho incluyendo Parke Nacional Arikok.