Sabana Basora – Diamars mey anochi birando diaranson informacion ta drenta di un accidente serio ariba e caminda di Sabana Basora.
Informacion adicional tawata papia cu un persona lo a keda benta ariba caminda, despues di e accidente.
Mesora diferente unidad policial a cuminsa bay e sitio. Na yegada agentenan a constata cu lo tawata trata di un accidente entre un Blazer y motorcycle cu segun nos a compronde a resulta di ta un Scooter.
Polisnan a papia cu e motociclista y e tawata bisanan cu e tin dolor na varios parti di su curpa.
Mientrastanto un otro agente tawata na Blazer, unda e chauffeur tambe tawata herida y pega den e auto.
No ta conoci exactamente con e accidente a sosode, pero e resultado final ta cu e Blazer a kibra e cura di cas y bay pega contra muraya di e cas. E scooter tambe a keda benta dilanti por bisa prácticamente total los.
Dos unidad di Ambulance a presenta y tambe dos unidad di Brandweer. Den un tempo corto bomberonan a logra saca chauffeur di e Blazer.
Tanto e motociclista y chauffeur di e Blazer a wordo transporta pa Hospital, no ta conoci pa nos con serio nan condicion ta .
