Donald Trump ta alega fraude: ’Contamento di voto mester stop awor’

WASHINGTON – Presidente Donald Trump kier stop e contamento di voto den tur estado. Tocante esaki, Corte Supremo lo mester dicidi. E presidente ta alega di a gana e eleccion caba pero cu tin ’fraude’. Esaki el a bisa den un discurso den careda di 2.30 di marduga. Esaki a ocasiona rabia na banda di e campañadornan di Biden. „Nunca antes den nos historia un presidente a yega di purba di kita voto di Americanonan.”
„Nos tawata prepara pa un triunfo grandi. Nos tawata ganando pero diripiente esaki a wordo para”, Trump a bisa. Su posicion tawata mustra hopi malo, pero e eleccion a resulta di ta un nek-aan-nek-race. Na e momento aki Fox News a bisa cu Joe Biden a logra 238 voto electoral mientras cu Trump a logra 213. E resultado di algun ‘swing-states’ importante ainda no ta conoci.
Mientras ainda votonan ta wordo conta, Trump ta reclama victoria den varios estado. Na mesun momento e ta sugeri cu e proceso electoral no a sosode na manera correcto. „Arizona tawata bunita. Nos a bai bon, pero mi a mira e cifranan baha substancialmente, cu solamente un cantidad chikito di voto.”
„Nos tawata tin asina un bon anochi. Wak tur e estadonan ey. Wak e margennan. Nos a gana estadonan y wak kiko a pasa cu e eleccion, kiko a pasa? De repente tur cos a para. Esaki ta un fraude pa e publico Americano. Un berguensa pa nos pais. Nos tawata ganando y eigenlijk nos a gana e eleccion. Nos meta ta pa consolida e integridad di nos pais. Esaki ta un momento grandi! Un berguensa gigante. Nos ta bai Corte Supremo y nos kier pa nan stop e contamento di voto.”
E declaracion di Trump ta un berguensa, e ta incorrecto y sin precedente, e manager di campaña di Joe Biden a bisa den un declaracion. Si e presidente ta bai purba via huez pa stop e contamento di voto, nos team huridico ta cla pa resisti contra esaki. Y nos lo gana.”
„Ta un berguensa y un intento – cu no por ignora – pa kita derechonan democratico di ciudadanonan. Esaki ta algo sin precedente pasobra nunca antes den nos historia un presidente a yega di purba di kita e voto di Americanonan den un eleccion nacional. Y esaki ta un error pasobra e conteo no lo bai stop. E lo sigui te ora cada voto legal wordo conta. Pasobra ta esey nos ley ta prescribi.”
Ora Trump a tene su discurso, e tawata tin un bentaha ariba Biden den algun estado, pero tin hopi voto pa conta ainda, casi sigur principalmente votonan haci via post. Eyden teoreticamente lo por tin mas Democrata. Trump no kier laga e votonan ey conta.
Un cantidad innumerable di politico na Estados Unidos, tambe algun Republicano, ta papia di degrada e sistema electoral.
Na CNN e paso aki di Trump a wordo yama ’anti-democratico’. Un presidente cu kier stop e proceso di voto, ta ‘historico e impactante’ segun analistanan. Ainda miyones di voto mester wordo conta. Tambe Chris Wallace di Fox News, cu generalmente ta faborece Trump, a bisa cu Trump ’ta tira swafel ariba un situacion explosivo’ cu su declaracionnan tocante fraude.
Durante anochi as bira mas y mas cla, cu Trump ta un candidato serio pa gana eleccion na Estados Unidos. Oficinanan di apuesta, a cambia nan preferencia grandi pa Biden pa un preferencia grandi pa Trump. Despues esaki a cambia un tiki. Nieuwsmedia a bisa a base di encuesta, cu Biden ta parce di ta e ganador na por ehempel New Hampshire y, segun Fox News, tambe na Arizona. Pero ainda tur voto no a wordo conta. Entre otro na Wisconsin y Michigan – estadonan crucial – esaki lo bai dura largo.