ORANJESTAD- Diasabra 24 di october a tuma lugar e proyecto anual di “Kiwanis K- One Day”. Rond di mundo ariba e di cuater diasabra di october tur club di Kiwanis ta hasi un proyecto comunitario. E idea ta pa e miembronan haci un proyecto hunto cu e meta pa finaliza esaki den un dia. E aña aki e comision di “Kiwanis One Day” di Kiwanis Club of Aruba a scoge como proyecto pa duna un “facelift” na St. Dominicus College. Cu e proyecto aki Kiwanis Club of Aruba kier contribui di un manera positivo cu e muchanan y comunidad di Playa.
Un grupo hopi entusiasma di boluntario a bin hunto for di 8’or di mainta na St. Dominicus College pa haci trabou di mantencion y retoca e verf di e plenchi di scol. Un total di 80 ora di servicio comunitario cu a wordo dedica na e proyecto aki. Na final di e dia e miembronan di Kiwanis Club of Aruba a wordo sorprendi door di cabesante di St. Dominicus College cu un certificado di aprecio pa e tempo y trabou cu nan a realisa pa e scol.
Kiwanis Club of Aruba kier a gradici tur e miembronan, maestronan y boluntarionan cu a haci “Kiwanis ONE Day” uno exitoso. Danki na tur esnan cu di un of otro manera a duna un man pa asina logra realisa e proyecto. Kiwanis Club of Aruba ta desea e alumonan di St. Dominicus College hopi exito den e aña escolar 2020 – 2021.
