Oranjestad – Minister Xiomara Maduro ta informa cu ta bay cuminsa cu un serie di programa ‘Aruba Fuerte y Resiliente, Reactivando nos Economia’ tur dialuna pa 7:30 pm na TeleAruba. E programanan aki ta pa nos comunidad por keda na altura di e actividadnan economico cu Gobierno di Aruba por medio di Departamento di Asuntonan Economico, Comercio y Industria (DEZHI) ta fomenta pa ehecuta e Maneho Economico Fuerte y Resiliente pa Pais Aruba.
Aruba Fuerte y Resiliente – Reactivando nos Economia
E mandatario ta informa cu e serie di programa ‘Aruba Fuerte y Resiliente, Reactivando nos Economia’ lo inicia dialuna awor dia 2 di november. E prome topico ta e ‘Plan Strategico Nacional: Nos Plan, Nos Futuro’ (NSP) lo wordo trata durante dos programa cu lo pasa na TeleAruba riba dialuna dia 2 di november y dia 9 di november. E NSP ta consisti di 9 programa di accion y un representante di cada programa lo brinda informacion tocante e trabounan realisa y e importancia di cada programa. Durante e prome programa Minister Maduro lo duna informacion general tocante di e NSP, sigui pa sra. Maria Dijkhoff-Pita directora di DEZHI cu lo elabora riba e proceso y tur e trabounan cu a wordo haci pa yega na e NSP. Alabes den e prome programa aki tin como invitado sra. Mari-Lou Lejeuz-Figaroa cu ta presidente di e Grupo di Trabou di Indicador, sr. Gisberth Boekhoudt, miembro di e Grupo di Trabou di Maneho di Recursonan Natural y sra. Jocelyne Croes cu ta Presidente di e Comision di SDGs – Metanan di Desaroyo Sostenibel – y cu tambe ta miembro di e Grupo di Trabou di ‘Aruba como modelo pa e Metanan di Desaroyo Sostenibel’. Durante di e di dos parti di e programa di NSP lo entrevista e representantenan di e cinco otro Gruponan di Trabou.
Iniciativa pa desaroyo di nos economia
E mandatario ta informa cu hopi trabou ta wordo haci pa stimula economia di Pais Aruba. Durante di e serie di programa ‘Aruba Fuerte y Resiliente –Reactivando nos Economia,’ Pueblo di Aruba ta keda na altura di tur e trabounan y iniciativa den e parti di economia di nos Pais. Durante e proximo simannan e programa lo tin como topico Alivio Fiscal, Sectornan Prometedor pa Diversificacion di Economia y lo continua cu otro iniciativanan cu ta tuma luga pa desaroyo di Aruba su economia.
FIN
20201031-01