E nivel di anticuerpos ta disminui bastante rapido despues di un infeccion di coronavirus, segun investigadornan.
Anticuerpos ta un parti esencial cu nos sistema di defensa tin, pa stop e virus di penetra e celnan humano.
E team di Imperial College London a ripara cu e cantidad di hende cu a test positivo pa anticuerpos a cai cu 26% entre juni y september.
Nan ta bisa cu ta parce cu e imunidad ta fayando y cu ta existi un riesgo di wordo contagia mas biaha cu e virus.
E noticia aki ta bin na mesun momento cu e Oficina di Estadistica Nacional a mustra cu e cantidad di morto pa motibo di Covid-19 na UK a crece cu 60% den e sinan di 16 di oktober.
Mas di 350.000 hende na Inglatera a haci un test di anticuerpos como parti di e estudio REACT-2 te cu awor.
Den e prome parti di testing, na fin di juni y comienzo di juli, mas o menos 60 di 1.000 hende tawata tin anticuerpos.
Pero den e ultimo parti di test, na september, solamente 44 di 1.000 a test positivo pa anticuerpos.
Esaki ta mustra un caida di mas di 25%.
“Imunidad ta cai rapidamente, nos ta solamente tres luna despues di nos prome testnan y ya caba nos ta mirando un rebaho di 26% den anticuerpos,” segun Profesora Helen Ward, un di e investigadornan.
E caida aki tawata mas grandi entre esnan mas bieuw cu 65, compara cu esnan den gruponan mas jong, y tambe den esnan asintomatico compara cu esanan cu Covid-19 sintomatico.
E cantidad di trahadornan den area cu salud, cu tawata tin anticuerpos a keda relativamente halto, locual investigadornan ta kere cu ta bin door cu nan ta exponi regularmente na e virus.
Anticuerpos ta pega na e superficie di e coronavirus pa stop e di invadi e celnan di nos curpa y ataca e resto di nos sistema imunologico.
Kiko exactamente e caida di anticuerpos ta nifica pa imunidad, ainda no ta sigur. Tin otro partinan di e sistema imunologico manera T-cells, cu tambe ta hunga un rol, matando host cells infecta y yamando otro celnan imunologico pa yuda.
Sin embargo, investigadornan ta avisa, cu e presencia di anticuerpos por duna un bon prediccion tocante proteccion.
Profesora Wendy Barclay a bisa: “Nos por wak e caida den anticuerpos y nos sa cu anticuerpos ariba nan mes, ta duna basta proteccion.”
“Ami lo bisa, cu ta mustra cu imunidad ta baha na mesun grado cu e anticuerpos ta baha, y cu esaki ta un indicacion di un imunidad menguante.”
Tin cuatro otro coronavirus humano cu nos ta contagia cu nan varios bes den nos bida. Nan ta causa sintoma normal di verkoudheid, y nos por wordo reinfecta cada 6 pa 12 luna.
Varios hende tin sintoma leve of asta ta asintomatico.
For di un estudio publica awe pa Office for National Statistics, a sali na cla cu dos di cada tres hende cu test positivo pa coronavirus no ta experiencia nungun di e sintomanan primario.
Cifranan separa di ONS a demostra awe, cu mortonan di Covid-19 den Reino Unido a crece for di bou di 500 pa mas di 750 den e sinan di 16 di oktober, aumentando e cantidad di mortonan cu 6% ariba e nivel normal pa e temporada aki.
Durante e peak, cu tawata April, 9, 2020, 500 morto di Covid-19 a wordo registra den un solo sinan.
Tawata tin masha poco caso confirma di hende cu a haya Covid dos biaha. Sin embargo, investigadornan ta adverti, cu e motibo por ta, cu imunidad net a cuminsa baha despues di e nivelnan halto di infeccion di maart y april 2020.
E speranza tey, cu un di dos infeccion lo ta menos severo cu e prome, asta si e imunidad baha, mirando cu e curpa ta suppose di tin “immune memory” di e prome encuentro y lo sa con pa bringe.
Investigadornan ta bisa cu nan descubrimentonan no ta desbarata e speranza di un vacuna, cu por proba di ta mas efectivo pa imunidad, cu un infeccion real.
Un di e investigadornan, Profesor Graham Cooke, a bisa: “E prome bista despues di e prome ola, ta cu e gran mayoria no tawata dispone di imunidad.
“E necesidad pa un vacuna ainda ta hopi grandi, e informacion aki no ta cambia esey.”
Profesor Paul Elliott, director di e estudio REACT-2 a bisa cu ta un error pa, a base di e estudio aki, bai saca conclusionnan firme tocante e impacto di un vacuna.
El a bisa: “E respuesta di un vacuna por ta diferente cu e respuesta contra un infeccion natural.”
Pero el a bisa cu ta posibel cu algun persona lo mester un follow-up booster dosis di cualkier vacuna cu lo bira disponibel, pa compensa e caida di imunidad cu paso di tempo.
Comentando ariba e conclusionnan aki, Profesor Jonathan Ball di University of Nottingham a bisa: “E estudio ta confirma e sospecho cu e nivel di anticuerpos – especialmente den e poblacion di edad vulnerable – ta baha cu paso di tempo.”
Sin embargo, el a bisa, cu ainda ta importante pa haya un bista con e imunidad protector ta funciona.
Profesor Eleanor Riley di University of Edinburgh, a bisa cu ta hopi prematuro pa asumi cu imunidad no ta keda, pero e informacion ta alimenta e preocupacion, cu anticuerpos produci door di infeccion natural por ta di corto duracion, manera ta e caso cu e otro tiponan di coronavirus.”
Fuente: BBC