ORANJESTAD – Gobierno di Aruba ta trahando pa por realisa e industria di cannabis medicinal. Cu e meta aki ta institui e Bureau Medicinal Cannabis Aruba (BMCA).
Bureau Medicinal Cannabis Aruba (BMCA)
Pa por maneha e industria aki conforme reglanan internacional (Enkelvoudig Verdrag van de Verenigde Naties inzake verdovende middelen van 1961), Gobierno di Aruba ta institui un departamento nobo, Bureau Medicinal Cannabis Aruba (BMCA). E departamento aki lo bira e autoridad oficial di Gobierno pa duna autorisacion pa cada importacion y exportacion di cannabis medicinal cu wordo produci na Aruba. Unabes e permiso di cultivo y/of extraccion wordo otorga na esnan cu ricibi e licensia, e inversionista local y/of internacional tin e obligacion conforme e reglanan internacional di e ‘Enkelvoudig Verdrag 1961,’ di wordo controla door di e International Narcotic Board (INCB). E tarea principal di BMCA ta pa controla cu tur inversionista ta tene nan mes na e regulacion di International Narcotic Board (INCB) y INCB lo controla BMCA regularmente pa wak si e inversionista y BMCA ta traha conforme e tratado internacional di 1961.
Reto den sector financiero
E beneficionan economico di e industria di Cannabis Medicinal pa Pais Aruba ta grandi. E comision ta trahando duro riba e preparacionan pero a encontra un reto den e sector financiero. Banconan comercial local ta traha cu banconan coresponsal na Merca y na Europa y ta mara na reglanan internacional di ‘Financial Action Task Force’(FATF) pa combati labamento di placa y financiamento di terorismo. Door cu e banco corresponsal ta haci un link cu historia di “marihuana” como droga illegal, esaki ta haci cu e industria di cannabis ta cay bou di industria di riesgo. Consecutivamente e banconan comercial local no por habri un cuenta pa e cultivadornan. Apesar di e reto aki, Gobierno ta continua explorando otro posibilidad y pronto ta premira pa keda cla cu esaki.
Legislacion
E Ley di ‘Landsverordening Verdovende Middelen’ a wordo adapta pa por cultiva y exporta cannabis pa rasonan medicinal. E ley a pasa su trayecto di legislacion (wetgevingstraject) y ta warda awor pa wordo trata den Parlamento pa haci’e posibel cu por otorga licencia, cultiva, haci extraccion y exporta cannabis pa traha e producto final medicinal den exterior.
Controlnan riguroso
Gobierno ta enfatisa cu e benta y uso di marihuana y/of cannabis medicinal sin permiso ta keda ilegal y cultivacion y extraccion sin vergunning tambe ta keda castigabel. Bureau Medicinal Cannabis Aruba (BMCA) lo bay opera segun e reglanan y proceduranan internacional di International Narcotic Board (INCB). E cultivacion y extraccion di cannabis medicinal lo cay bao di controlnan hopi estricto conforme tratado internacional (Enkelvoudig Verdrag van 1961) como tambe control local. Tur persona cu ta bay traha den e industria aki mester tene nan mes na medidanan halto di seguridad. E industria aki ta safe y no ta dañino pa ningun hende, alcontrario elo yuda cu e desaroyo economico na bienestar di nos Pais. Na momento cu e Ley keda aproba den Parlamento, Gobierno por cuminsa otorga licensia pa cultiva y hasi extraccion pa exporta cannabis pa uzo medicinal. Den e ultimo kwartaal di e aña aki ta programa pa cuminsa institui e Bureau di Canabis Medicinal.
FIN
20201014-01