Home » Segun dos estudio, personanan cu tipo di sanger 0 por ta menos vulnerabel pa Covid-19

Segun dos estudio, personanan cu tipo di sanger 0 por ta menos vulnerabel pa Covid-19

by Admin
0 comment 60 views

Hende cu sanger tipo O lo por ta menos vulnerabel pa Covid-19 y lo por tin menos risico pa bira hopi malo, segun dos estudio publica diaranson pasa.

Investigacion ta demostra cu e grupo of tipo di sanger di un persona ta hunga un rol den su tendencia pa keda infecta cu Covid y tambe den e risico cu su situacion lo bira critico. E motibonan pa e conclusion aki no ta completamente cla, y mas investigacion ta necesario.

Un estudio na Dinamarca a demostra cu entre 7.422 persona cu a test positivo pa Covid-19 solamente 38.4% tawata tin tipo di sanger O, aunke e grupo aki ta representa 41.7% di e poblacion. Den contraste, 44.4% di e grupo A a test positivo, mientras cu e grupo aki ta forma 42.4% di e poblacion.

“Nos no sa si esnan den e grupo O ta disfruta di un of otro tipo di proteccion, of ta trata aki di un vulnerabilidad mas grandi di esnan den e otro gruponan. E investigacion aki ta den interes di sciencia. Una vez cu nos sa kiko e mecanismo ta, esaki lo por wordo uza proactivamente den tratamento.” Esaki, segun Dr. Torben Barington, profesor clinico na Odense University Hospital y University of Southern Denmark.

Bo tipo di sanger generalmente no ta haci un diferencia den bo bida diario, tanten cu bo no mester di un transfusion di sanger. Pues, hende no mester worry demasiado cu e coneccion entre tipo di sanger y Covid-19, segun Dr. Barington.

Den un otro estudio, cu a tuma lugar na Canada, entre 95 patient di Covid-19 cu tawata den situacion critico, investigadornan a ripara cu 84% di esnan cu sanger tipo A of AB- mester a wordo conecta na machine di ventilacion compara cu patientnan cu sanger tipo O of B, cual tawata 61%.

For di e estudio haci na Canada tambe a bin resulta, cu esnan cu sanger tipo A of AB tawata keda mas largo den intensive care – un promedio di 13.5 dia – compara cu esnan cu tipo di sanger O of B, kendenan mester a permanece den intensive care pa un promedio di 9 dia.

“Mi no ta kere cu esaki ta motibo pa conclui cu factornan manera edad y otro factornan cu ta contribui na mortalidad a bira menos importante.” Dr. Mypinder Sekhon, specialista di intensive care na Vancouver General Hospital, a remarca.

Mientras cu ta existi diferente teoria, expertonan ainda no sa cua mecanismo lo por splica e coneccion entre Covid-19 y e diferente gruponan di sanger.

Sekhon a bisa cu un posibel splicacion lo ta, cu hendenan den grupo di sanger tipo O, nan sanger ta stol menos lihe, cual ta duna menos chance pa haya bloedklot. E nivel di e chance cu un persona tin pa haya bloedklot ta un factor importante den e severidad di Covid-19. Tambe e por tin di haber cu e antigenes di e grupo di sanger, y nan influencia ariba e produccion di anticuerpos. Of e por ta conecta cu genes asocia cu e tipo si sanger y su efecto ariba receptornan den e systema imunologico.

Mientras cu ambos estudio, cu a sali publica den e journal Blood Advances, a produci evidencia di un coneccion entre tipo di sanger y un persona su vulnerabilidad pa infeccion di Covid y e chance pa esaki bira uno severo, te ainda no tin motibo pa panico si bo tipo di sanger ta cai den grupo A.

Esaki sin embargo, segun Dr. Sekhon – kende ta fungi tambe como assistant professor na Universidad di British Columbia – tampoco ta nifica cu si bo tipo di sanger ta tipo O, bo por bai disfruta den clubnan y barnan libremente y sin preocupacion.

Un estudio separa, publica den The new England Journey of Medicine na juni 2020 a haya data genetico den algun patient di Covid-19 y tambe den algun persona sano, cu ta sugeri cu esnan den grupo A tin un risico mas halto di keda infecta cu Covid y cu esnan cu sanger tipo O ta core menos risico.

Aunke investigadornan no a yega ainda na e punto unda e hypothesis aki a keda completamente proba, ainda nan no a mira algo cu ta inconsistente cu e conclusion aki.

Fuente CNN.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio