Aruba a conoce diferente crisis den su historia. Esaki ta esun peor. Mas cu nunca Aruba ta den un necesidad urgente pa un Plan di Rescate pa salba nos Pais y trece prosperidad y felicidad pa nos Pueblo. E crisis economico, e desempleo, e pobresa y e falta di perspectiva pa un miho futuro ta na un nivel sin precedente den historia di Aruba. Aruba mas cu nunca mester di su mihor hendenan, mihor ideanan y mihor iniciativa pa nos por no unicamente recupera, pero recupera mihor como Pais y sociedad for di e crisis aki.
Lider di AVP, mr. Mike Eman hunto cu institutonan Fundacion Digna Lacle-Herrera (FDLH), Fundacion Mito Croes (FMC) y Plataforma Hobennan Profesional (PHP) ta anuncia Diahuebes anochi 7’or e proceso cu e partido lo encamina hunto cu e institutonan pa yega na un plan integral di recuperacion pa Aruba.
Mr. Mike Eman a expresa cu cada generacion di nos Pais a yega di realisa cu nan tin un yamada pa contempla riba e nececidad y aspiracionan cu ta biba den comunidad y traduci esaki den un perspectiva nobo pa futuro, un Plan di Pais. Cada un den su tempo, enfrente di su realidadnan a accepta e reto, mission y destino aki. Supera retonan grandi cu un causa cu a nace for di cuna di un sentimiento comun a bai na caracterisa nos den curso di historian a momentonan transcendental, Eman a invatisa.
E ta bias cu e reciente Brainstorming cu mundo menico y gremionan a demonstra un vez mas cu e deseo tey den nos comunidad pa dialoga, scucha otro, pensa y fiha solucionan pa nos Pueblo y Pais.
Scucha, pensa, recupera mihor ta e proceso cu partido AVP lo sigui pa delinea – hunto cu pueblo – un causa comun nobo pa por realisa felicidad atrobe pa Aruba. Hunto nos lo duna direccion na futuro di Aruba cu un vision cu ta ensera logronan a corto y largo plazo. Eman a expresa cu e solucionan lo ta concreto y no lo tin color politico. Nan lo ta solucionan cu ta producto di Brainstorming cu henter nos comunidad. “Nos lo cana e proceso aki cu pueblo den cooperacion y consulta cu nos institutonan, Fundacion Mito Croes, Fundacion Digna Laclé-Herrera y Plataforma Hobennan Profesional” Eman a splica. Diahuebes 7’or di anochi riba plataformanan y rednan social e proceso pa yega na un plan integral, Scucha, Pensa y Recupera Mihor, lo worde comparti cu comunidad.