Home Local Fundacion Respaldo hunto cu Jordan Ling Foundation ta lansa campaña di conscientisacion...

Fundacion Respaldo hunto cu Jordan Ling Foundation ta lansa campaña di conscientisacion tocante Salud Mental.

SHARE

“Inversion den Salud Mental ta sumamente importante”

ORANJESTAD, Aruba 12 di October 2020: October ta e luna di conscientisacion riba salud mental y Fundacion Respaldo hunto cu Fundacion Jordan Ling a prepara un serie di programanan den cuadro di Dia Mundial di Salud Mental cual tabata dia 10 di October.
Fundacion Respaldo a wordo funda na 2017 pa asina atende cu e problematica di salud mental na Aruba. Nan a wordo funda den cooperacion cu AZV, Hospital y e vakgroep di psikiatranan.
Ta un esfuerso despues di hopi aña cu a purba di lanta un fundacion cu lo ta e ‘overkoepelend orgaan’ pa loke ta trata salud mental.
Jerianne Tiel, cu for di 2017 ta traha cu Fundacion Respaldo den e team di maneho, a splika den e programa di “Entrevista di Dia” cu Sr. Aldrich Croes na Hits100FM, cu tin hopi raport unda a conseha e gobiernonan pa enfoca mas atencion riba Salud Mental.
A yega asina leu na 2017 unda cu tur e partidonan tabata enfoca riba e mesun meta. Asina Respaldo a wordo lanta. Na Januari 2018, Respaldo a tuma over e actividadnan cu PAAZ di Hospital tabata realisa, hunto cu e edificio y e personal.
Conhuntamente cu ‘Balance’, cu tabata e policlinica di psikiatranan independiente di Aruba, a inicia e labornan na 2018 purbando di lanta un fundacion cu e obhetivo di mehora e calidad di cuido di salud mental pa Aruba.
Tiel a splica cu door di e centralisacion aki, awor por traha di un manera mas eficiente den loke ta un maneho mas specifico y riba e mehoracion di locual kier ofrece na e cliente.
“Ora cu bo ta uni tur e esfuersonan ey hunto, bo por yega hopi mas leu. Separa, e ta tuma hopi mas energia. Si nos wak esaki solamente den e parti di eficiencia, ya caba bo tin hopi pa gana eynan”, el a expresa.
Respaldo ta un proyecto basta grandi y un reto enorme, principalmente mirando cu salud mental na Aruba no ta un topico cu ta haya suficiente atencion. E stigma na Aruba ta hopi grandi te cu e dia di awe.
For di 2018 te cu 2020 por constata adelantonan y con hopi ta wordo papia den comunidad riba salud mental y con hopi conscientisacion a wordo crea, Jerriene Tiel a comenta.
Fundacion Respaldo a cuminsa cu 50 empleado y aworaki tin rond di 100 empleado cu ta trahando pa salud mental na Aruba. Ta bezig ta implementa mas y mas calidad den e mehoracion di loke ta e trato cu nan ta duna, teniendo na cuenta e standardnan internacional.
Jerianne Tiel a agrega cu Respaldo ta atende rond di 3 mil cliente riba un base anual. E policlinica ta atende muchanan rond di 4 aña te na hende cu edad mas halto. Salud Mental ta wordo afecta sin importa edad y profesion.
Hopi hende tin miedo di papia di esaki y eynan ta unda cambio mester tuma lugar ainda.
Na aña 2018 a inicia cu e servicio ambulatorio di e FACT-teams. Actualmente, Respaldo tin 2 FACT-teams. Un ta traha na Playa y otro na San Nicolas. Ta trata di un grupo multi-disciplinario di specialistanan cu ta atende cu clientenan cu problemanan mas grandi cu ta haya tratamento na cas. Esey ta un servicio nobo cu a wordo añadi pa Aruba den e ultimo añanan, asina Sra. Tiel a splica.
E tema di aña 2020 ta ‘Inverti’. Un 2 % di e presupuesto nacional so ta wordo aloca pa Salud Mental. Esey ta un porcentahe hopi abao si ta wak cu e gastonan relaciona cu salud mental ta hopi halto.
Gastonan directo ta entre otro gastonan medico, remedi, terapia. Pero hopi biaha no ta wak e gastonan indirecto cu ta e perdida di productividad, e gastonan social, gastonan di educacion y di orden publico, Jerianne Tiel a duna di conoce.
El a finalisa bisando cu e inversion den salud mental ta sumamente importante y si ta wak e situacion di Covid-19 na mundo, ya caba por premira cu e necesidad pa salud mental ta bay crece.

CAMPAÑA

Respaldo hunto cu Jordan Ling Foundation, durante un luna largo ta lansa un campaña pa asina trece mas informacion riba e tema di salud mental pa comunidad.
Cinco aña pasa e hoben Jordan Ling, kende a sufri di salud mental a fayece, pesey a lanta e fundacion Jordan Ling. Na inicio di e campaña di concientisacion, Tata di Jordan, Sr, Clifton Ling a expresa cu e fundacion su meta principal ta pa sembra luz riba salud mental door di educa, concientisa y yuda des-stigmatisa e malesanan mental den nos comunidad.
Desde cu Covid-19 tambe a afecta Aruba, e fundacion a realisa con importante salud fisico como salud mental ta mientras cu ta enfrenta y combati e pandemia riba e isla.
“Mi ta encurasha tur hende di keda safe y sea fuerte y sea solidario durante e periodo aki.
Bo no ta bo so. Tin ayudo y no tin miedo di puntra pa ayudo. Salud mental no ta un topico di tabu y nada di tin berguensa di dje. E fundacion a wordo crea pa duna apoyo na nos comunidad pa por trata mihor cu salud mental na Aruba y duna honor na Jordan Ling, kende a fayece exactamente 5 aña pasa, pero lo biba den nos curason pa semper”, Clifton Ling a expresa. Den media lo keda publica dianan di e programanan cual lo pasa na Radio y Television.