Sacramento, California: Diasabra den oranan di merdia polis di Sacramento a haya informacion di un caso serio di tiramento cu varios persona herida. Mesora nan a sali bay direccion di Mama Marks Park, na Haywood Street. E tiramento a sosode net durante un encuentro di famia den e Parke.
Na yegada nan a bin compronde cu tabata tin un encuentro familiar den e parke y durante e encuentro di famia aki lo a tuma luga un drive by shooting, den cual un mucha muher di 9 aña a fayece mesora na e sitio y otro tres persona a keda herida, den cual un otro mucha muher di apenas 6 aña, un homber y un muher kende su situacion ta hopi critico.
Polis no por bisa si e drive-by shoooting aki ta relaciona cu problema di gang. Segun un testigo, den careda di 1’or di merdia, un persona for di den un auto a cuminsa los varios tiro den direccion di e famia aki.
Segun e vocero policial e caso di tiramento aki ta uno extremadamente tragico y emocional pa e famia.
Den un relato di polis, a wordo publica cu e recherchenan mesora a cuminsa cu un investigacion extenso, buscando testigonan y evidencianan. Segun e relato ainda ta prematuro y informacion ta limita pa por duna un update mas extenso.
